Солтүстік Қазақстан облысында сүт өндірісін арттыруға бағытталған ірі инвестициялық жоба жүзеге асырылуда. «СК Агро 2050» ЖШС-нің Мағжан Жұмабаев ауданындағы тауарлы сүт фермасына Германиядан 165 бас асыл тұқымды голштино-фриз сүтті сиырлары жеткізілді. Бұл туралы Ауыл шаруашылығы министрлігінің баспасөз қызметі хабарлады.
Жеткізілген мал Қарағанды әуежайында қажетті ветеринариялық рәсімдерден өтіп, ферма аумағындағы карантинге орналастырылды. Қазір оларға ветеринариялық-профилактикалық шаралар жүргізілуде.
Жоба аясында фермаға барлығы 660 бас жоғары өнімді асыл тұқымды мал әкелу жоспарланған. Қалған 495 бас кезең-кезеңімен жеткізіледі.
Асыл тұқымды мал сатып алуға «Береке» бағдарламасы аясында «Солтүстік» ӘКК арқылы 1,4 млрд теңге қаржы берілді.
Жобаның негізгі мақсаты – жоғары өнімді аналық мал санын көбейту және сүт өндірісінің тиімділігін арттыру. Алдағы уақытта фермадағы мал санын 12 мың басқа дейін жеткізу жоспарланып отыр. Кәсіпорын толық жобалық қуатына шыққан кезде тәулігіне 150 тоннаға дейін сүт өндіру көзделген.
Сурет: АШМ
