Қостанайдағы дәнді-бұршақты дақылдарды өңдеумен айналысатын Kaizen зауытының аумағында жылына 40 мың тонна макарон фабрикасының құрылысы басталды. Жобаның инвестициялық құны 15 млн доллар. Бұл туралы Қостанай облысы әкімінің баспасөз қызметі хабарлады.
Жобаны Arbel түрік холдингі жүзеге асыруда. Макарон фабрикасында 70 жұмыс орны ашылады.
«Мемлекет басшысы үш жыл ішінде агроөнеркәсіп кешеніндегі өңделген өнімнің үлесін 70%-ға дейін арттыру міндетін қойды. Біздің өңір өңдеуші өнеркәсіп көрсеткіштері бойынша республикада көш бастап тұр. Kaizen ЖШС бұл бағытқа елеулі үлес қосуда. Arbel түрік холдингі кәсіпорынға 4 млрд теңге инвестиция салып, нәтижесінде жаңа жұмыс орындары ашылды. Өткен жылы компания мемлекетке 100 млн теңгеден астам салық төледі», – деп атап өтті Қостанай облысының әкімі Құмар Ақсақалов.
Қазіргі уақытта өндірісте дақылдардың төрт түрі өңделеді: бұршақ, ноқат, жасыл және қызыл жасымық. Бүгінгі күні кәсіпорын технологиялық жарақтандыру деңгейі және өндірістік процестерді ұйымдастыру тұрғысынан дәнді-бұршақты дақылдарды өңдеу саласындағы солтүстік өңір үшін бірегей болып саналады. Өндіріс сапа мен қауіпсіздік талаптарына толық сәйкес келетін қосылған құны жоғары өнімдерді шығаруға бағытталған.
Arbel Group компаниялар тобының президенті Хусейн Арсланның айтуынша, өнімдер ішкі нарыққа да, экспортқа да жеткізіледі. Сыртқы сауда географиясына Түркия, Алжир, Ауғанстан, сондай-ақ бірқатар Еуропа елдері кіреді. 2025 жылы кәсіпорын 180 мың тонна өнім өндіріп, экспорттады.
Сурет: облыс әкімдігі
