Еліміздегі KTZ Express компаниясы Транскаспий халықаралық көлік бағыты инфрақұрылымын пайдалана отырып, Қостанай – Нью-Йорк бағыты бойынша қазақстандық бидай ұнын жеткізудің жаңа жөнелтілімін ұйымдастырды, деп хабарлады Ауыл шаруашылығы министрлігінің баспасөз қызметі.
Қазақстан ұнына деген сұраныстың артуы халықаралық нарықтардың біздің еліміздің өніміне тұрақты қызығушылық танытып отырғанын көрсетеді.
Жүк тасымалы теміржол және теңіз көліктерін кезектестіре қолдану арқылы көптүрлі (мультимодальды) контейнерлік форматта жүзеге асырылды. KTZ Express тасымалдың бастапқы кезеңін – жүктi контейнерге тиеу мен оны Қостанайдан Ақтау портына дейін жеткізуді қамтамасыз етті. Одан кейін жүк Каспий теңізі арқылы Алат портына жеткізіліп, әрі қарай Поти порты арқылы Қаратеңізбен тасымалданып, Стамбул қаласы арқылы Жерорта теңізіне шықты.
Соңғы кезеңде бағыт Атлант мұхиты арқылы өтіп, жүк Нью-Йорк портына жеткізіледі. Теңіз арқылы тасымалдау әлемдегі ең ірі кеме қатынасы компанияларының бірі — CMA CGM серіктестігімен қолға алынды. Жалпы транзит уақыты 58 күн.
KTZ Express компаниясының мәліметінше, жүк жөнелтілген сәттен бастап соңғы жеткізу нүктесіне дейін толық бақылауда болады.
