Семей қаласында салынып жатқан Eurasia Agro Semey ет өңдеу кешені іске қосылғаннан кейін өнімін Кувейт нарығына экспорттауды жоспарлап отыр. Осы мақсатта компания Кувейттің ALMARAI National Co. компаниясымен ынтымақтастық туралы меморандумға қол қойды. Бұл туралы Қазақстан Республикасы Сыртқы істер министрлігінің баспасөз қызметі хабарлады.
Ведомствоның мәліметінше, аталған құжатқа қол қою Қазақстан мен Кувейт арасындағы сауда-экономикалық ынтымақтастықты дамытудағы маңызды қадам болып саналады. Сондай-ақ бұл келісім қазақстандық агроөнеркәсіп өнімдерінің Таяу Шығыс елдерінің нарықтарындағы үлесін кеңейтуге бағытталған.
Кувейтке жасалған сапар аясында қазақстандық компания өкілдері азық-түлік өнімдерін таратумен айналысатын ірі сауда тобы Al-Yasra, сондай-ақ Кувейттегі ең ірі супермаркет желілерінің бірі — The Sultan Center компанияларымен кездесулер өткізді. Тараптар Қазақстанда өндірілетін ет өнімдерін Кувейт нарығына жеткізудің ықтимал форматтарын талқылады.
Айта кетейік, Семей қаласындағы ет өңдеу кешенін 2026 жылдың тамыз айында пайдалануға беру жоспарланып отыр. Жобаға 7,7 млрд теңге инвестиция салынған. Кәсіпорын бір ауысымда 35 тоннаға дейін сиыр, қой және жылқы етін өңдей алады. Өндірісте шұжық өнімдері, консервілер, жартылай фабрикаттар мен ет деликатестері шығарылады.
Сонымен қатар, кешен аясында 7 мың бас ұсақ малға және 10 мың бас ірі қараға арналған бордақылау алаңдары іске қосылады.
Сурет: ҚР СІМ
