Мәжілісте Аграрлық мәселелер комитетінің жетекшісі Серік Егізбаевтың төрағалығымен етті мал шаруашылығын қолдау, мал басын көбейту және ауыл шаруашылығы жануарларының өнімділігін арттыру мәселелеріне арналған жиын өтті, деп хабарлады Мәжілістің баспасөз қызметі.
Серік Егізбаев етті мал шаруашылығы саласындағы мәселелерді айтты.
“Агроөнеркәсіп кешеннің негізгі бағыттарының бірі саналатын етті мал шаруашылығы соңғы жылдары саланың тұрақтылығы мен өсім қарқынына тежеу болатын бірқатар жүйелі мәселелерге тап болып отыр. Атап айтқанда, мемлекеттік қолдау шараларының тиімділік деңгейінің жеткіліксіздігі, сондай-ақ фермерлердің қаржы ресурстарына қолжетімділігінің шектеулілігі сынды мәселелер бар”, – деді Серік Егізбаев.
Комитет төрағасы атап өткендей, мал өнімінің төмендігі, асылдандыру жұмыстарының жеткіліксіздігі, өндірістің жем-шөп базасы мен жайылым инфрақұрылымына тәуелділігі, сондай-ақ ғылыми және кадрлық қамтамасыз етудің жай-күйі негізгі түйіткілдер қатарында қалып отыр. Серік Егізбаев ветеринариялық жағдайға ерекше назар аудару қажеттігін, себебі бұл өндірістің тұрақтылығы мен саланың экспорттық мүмкіндіктеріне тікелей әсер ететінін де айтты.
Отырыс барысында Мемлекет басшысының 2025-жылдың 8-қыркүйегіндегі Жолдауында Үкіметке мал шаруашылығы саласындағы агробизнесті қолдау жоспарын әзірлеп, оны қаржыландырудың пәрменді тетіктерін іске қосу тапсырылғаны сөз болды. Осыған байланысты Ауыл шаруашылығы министрлігі Мал шаруашылығын дамытудың 2026-2030 жылдарға арналған кешенді жоспарын әзірлеп, комитеттің талқылауына ұсынды.
Ауыл шаруашылығы вице-министрі Аманғали Бердалин осы Кешенді жоспардың басты бағыттары мен мал шаруашылығының қазіргі ахуалы туралы баяндама жасады.
“Бүгінде еліміздегі ірі қара мал саны 2,4 пайызға, ұсақ мал саны 1,6 пайызға артты. Сүт өндірісі шамамен 3,8 млн тоннаны құрап, өткен жылмен салыстырғанда 5 пайызға өсті. Ал ет өндірісінің көлемі 1,2 млн тоннаға жетіп, былтырғымен салыстырғандда 2,6 пайызға артты. Көрсеткіштер өсімінің мардымсыз болуы заманауи технологияларды енгізу және мал шаруашылығы жануарларының генетикалық әлеуетін жақсарту қажет екенін айқын көрсетіп отыр. Өндіріс көлемін ұлғайту ісі ерекше назарды талап етеді”,– деді вице-министр.
Дөңгелек үстел қорытындысы бойынша Аграрлық мәселелер комитеті түскен ұсыныстар мен сараптамалық пікірлерді жинақтап, Үкіметке тиісті ұсынымдар жолдамақ.
Сурет: ашық ақпарат көзі
