Қызылорда облысында құрғақ түйе сүтін өндіретін зауыт іске қосылады. Жобаға 3 млрд теңге инвестиция салынған. Оның 1,2 млрд теңгесі инвестордың өз қаражаты, 1,8 млрд теңгесі жеңілдетілген несие ретінде берілген мемлекеттік қолдау. Бұл туралы облыс әкімдігінің баспасөз қызметі хабарлады.
Жобаны «Qazaq Camel» ЖШС жүзеге асырады. Биыл наурыз айында іске қосылатын кәсіпорын жылына 392 тонна құрғақ түйе сүтін шығаруды жоспарлап отыр. Зауытта 23 жұмыс орны ашылады.
Бүгінгі таңда негізгі өндірістік ғимараттың құрылысы аяқталды, жабдықтарды монтаждау жұмыстары аяқталуға жақын.
Әкімдік 2025-жылдың қорытындысы бойынша Қызылорда облысының өңдеу өнеркәсібінде 406,3 млрд теңгеге өнім өндірілгенін, бұл өткен кезеңмен салыстырғанда 6,4%-ға артық екенін хабарлады. Соның ішінде азық-түлік өндірісі 3,4%-ға өскен.
Сурет: облыс әкімдігі
