Абай облысы әкімінің орынбасары Думан Оспанов Бесқарағай ауданына іс-сапармен барды, деп хабарлады Ауыл шаруашылығы басқармасының баспасөз қызметі. Іс сапардың негізгі мақсаты – ауданның ауыл шаруашылығы саласындағы әлеуетін зерделеу, шаруашылықтардың қазіргі жағдайымен танысу және салаға көрсетіліп жатқан мемлекеттік қолдау шараларының тиімділігін бағалау.
Сапар барысында облыс әкімінің орынбасары алдымен мал шаруашылығын дамыту бағытында жүиелі жұмыс жүргізіп келе жатқан «Ғанибет» шаруа қожалығында барды. Бүгінде шаруашылықта 210 бас қазақтың ақбас тұқымды сиыры, 50 бас жылқы бар. Өткен жылы қожалық асыл тұқымды шаруашылық мәртебесіне ие болған қожалық 4 мың гектар жайылымдық жерді тиімді пайдаланып отыр.
Шаруашылық алдағы уақытта 1000 басқа арналған бордақылау алаңын салуды жоспарлап отыр. Осы ретте қожалық басшысы мал шаруашылығын дамытуға бағытталған мемлекеттік бағдарламалар аясында жеңілдетілген несие беру мәселесін көтерді.
Облыс әкімінің орынбасары бұл бастаманың маңыздылығын атап өтіп, шағын және орта шаруа қожалықтарын қолдау өңірдің аграрлық әлеуетін арттырудың негізгі тетігі екенін жеткізді:
«Біз қазіргі уақытта осындай шағын шаруа қожалықтарына қолдау көрсетуіміз керек. Биыл тамыз айында облысымызда ет комбинатын іске қосу жоспарланып отыр. Бұл жергілікті шаруалар үшін өнім өткізудің жаңа мүмкіндіктерін ашып, мал шаруашылығын одан әрі дамытуға серпін береді», — деді Думан Оспанов.
Сапар қорытындысында облыс әкімінің орынбасары жауапты сала басшыларына шаруалар көтерген мәселелерді зерделеп, қолданыстағы мемлекеттік бағдарламалар шеңберінде нақты ұсыныстар әзірлеу тапсырды.
Сурет: Ауыл шаруашылығы басқармасы
