Қазақстанда агросектордағы су тапшылығын азайту және су үнемдеу технологияларын кеңінен енгізу мақсатында 2026–2028 жылдарға арналған республикалық бюджеттен қомақты қаржы қарастырылды. Бұл туралы Су ресурстары және ирригация министрлігінің баспасөз қызметі хабарлады.
Бюджеттің үш жылдық кезеңінде:
- су үнемдеу технологияларын енгізу үшін 214 млрд теңгеден астам,
- суармалы судың құнын субсидиялау үшін 13,5 млрд теңге бөлінеді.
Министрліктің мәліметінше, фермерлерге көрсетілетін мемлекеттік қолдау тетіктері жаңартылды. Енді:
- ұңғымаларды бұрғылау және су үнемдеу жабдықтарын сатып алу шығындарының 80 пайызына дейін мемлекет өтейді (бұрын – 50%);
- суды үнемдеу жүйелерін пайдалануға қарай сараланған субсидиялар енгізілді.
Биыл қабылданған жаңа Су кодексі саладағы бақылауды күшейтіп, су қорғау аймақтарында өз бетінше су пайдалануға тыйымдардың сақталуын қадағалауды күшейтті. Бассейндік инспекцияларға жедел әрекет ету құзыреті берілді.
Суару және коллекторлық-дренаждық жүйелердің жұмысын жақсарту мақсатында ирригациялық кондоминиум институты заңмен бекітілді. Бұл фермерлердің инфрақұрылымды жөндеу және қайта құру шығындарын азайтуға мүмкіндік береді.
Сонымен қатар, ауыл шаруашылығы қажеттіліктері үшін 2 млн текше метрге дейінгі еріген, нөсер және тасқын суларын жинайтын қоймалар салуға рұқсат беретін норма енгізілді.
Сурет: Agrotrend.kz
