Астанада өткен ауыл әкімдерінің диалог-платформасында Мемлекет басшысы Қасым-Жомарт Тоқаев ауыл кәсіпкерлігі мен кооперацияны дамытуға қатысты маңызды мәлімдеме жасады. Президент ауыл шаруашылығы кооперативтерінің жұмысы әлі де күткендей нәтиже бермей отырғанын айтып, бұл бағытты күшейтуді тапсырды. Бұл туралы Ақорданың ресми телеграмм арнасы хабарлады.
Мемлекет басшысы ауыл экономикасының өсімі кооперацияның тиімділігіне тікелей байланысты екенін атап өтті.
Президент атап өткен негізгі мәселелер:
- Қазіргі көптеген кооперативтерді аз ғана адам құрып, делдалдық қызметпен шектеледі;
- Олар өнім өндірушілер мен қайта өңдеушілердің арасын жалғап, мемлекеттен жеңілдік алады;
- Мұндай модель ауыл экономикасына нақты пайда әкелмейді және халық табысының артуына кедергі болады.
Президенттің айтуынша кооперация жұмысы бүкіл ел бойынша кең көлемде жүргізілуі керек. Жеке шаруалардың бірігуі ауыл кәсіпкерлігін жаңа деңгейге шығарып, тиімді өндірістік тізбек құруға мүмкіндік береді.
«Жеке шаруалар біріге алмаса, ауыл шаруашылығын дамытуға бағытталған мемлекеттік еңбек зая кетеді. Сондықтан кооперацияны күшейту – басты міндет», — деді Мемлекет басшысы.
Сондай-ақ ол «Ауыл аманаты» бағдарламасының нәтижелеріне тоқталып, жоба ауыл тұрғындарына нақты қолдау көрсетіп жатқанын атап өтті. Соңғы екі жылда бағдарлама аясында 20 мыңға жуық жұмыс орны ашылған.
Сонымен қатар бұл бағдарламаға қомақты қаржы бөлінетінін айтты.
«2029 жылға дейін “Ауыл аманаты” бағдарламасына 600 миллиард теңгеге жуық қаражат бөлінеді», — деп мәлімдеді Президент.
Бұл қаражат ауылдағы шағын және орта бизнесті дамытуға, табысы төмен отбасыларды қолдауға және ауыл шаруашылығы кооперацияларын кеңейтуге бағытталады.
Сурет: Ақорда
