Биыл астық егетін өңірлердің ауыл шаруашылығы тауар өндірушілері 378 мың гектар дәнді және майлы дақыл егістіктерін сақтандырды. Бұл туралы Аграрлық несие корпорациясының баспасөз қызметі хабарлады.
Жалпы сомасы 2,7 млрд теңгеге 268 сақтандыру шарты жасалған. Оның 80%-ын (2,1 млрд теңге) мемлекет субсидияласа, 20%-ын (544 млн теңге) фермерлердің өздері төлеген.
«Құрғақшылықтан сақтандыру дақылдардың вегетациялық кезеңінде топырақтағы ылғал тапшылығына байланысты тәуекелдерді қамтитын екі фазалы және үш фазалы сақтандыру бағдарламалары жүзеге асырылды. Космомониторинг деректеріне сәйкес сақтандыру кезеңі ішінде Ақтөбе, Батыс Қазақстан, Қостанай, Ұлытау және Павлодар облыстарының аумағындағы жалпы ауданы 80,4 мың гектарда құрғақшылық жағдайлары тіркелді. Сақтандыру жағдайлары туындағанда компаниялар 456,4 млн теңге сақтандыру төлемдерін жасады», — делінген Корпорация таратқан ақпаратта.
«Аграрлық несие корпорациясы» АҚ ауыл шаруашылығы өндірісінің тәуекелдерін төмендетуге және фермерлік қожалықтардың қаржылық тұрақтылығын қамтамасыз етуге бағытталған агроөнеркәсіптік кешенді қолдаудың мемлекеттік бағдарламаларын іске асыруды жалғастырады.
Сурет: Agrotrend.kz
