Абай облысының Ақсуат ауданында ауыл шаруашылығы саласын дамытуға бағытталған жаңа жоба іске қосылды, деп хабарлады Абай облысы әкімдігінің баспасөз қызметі.
Ақсуат ауданының Екпін ауылдық округіндегі «Мәуліт» шаруа қожалығында 5 мың бас ірі қараға арналған заманауи мал бордақылау алаңы жұмысын бастады.
“Агрокәсіпорында әзірге 1 200 бас еркек тайынша бар. Жиырма бес адам тұрақты жұмыспен қамтылған. Қыста қосымша 10 адамды жұмысқа тарту жоспарланып отыр. Қожалық жергілікті тұрғындар мен жеке шаруашылықтардан бұзауларды қабылдап, ауыл халқының табыс табуына мүмкіндік жасап отыр”, — делінген әкімдіктің баспасөз қызметі таратқан ақпаратта.
3 850 гектар жері бар шаруашылық заманауи техникамен толық жабдықталған. Жоба аймақтың ет өндірісін ұлғайтып, ауыл экономикасына қомақты үлес қосады, деген жоспар бар.
Сурет: облыс әкімдігі
