Ауыл шаруашылығы министрі Айдарбек Сапаров Ақмола облысында өңірдің аграрлық сектор өкілдерімен кездесті, деп хабарлады министрліктің баспасөз қызметі.
Ашық диалог түрінде өткен жиында мемлекеттік қолдаудың негізгі шаралары, заманауи агротехнологияларды енгізу, мал шаруашылығын дамыту және отандық агроөнеркәсіп кешенінің экспорттық әлеуетін арттыру мәселелері талқыланған.
Министрдің айтуынша, бүгінде сала алдында Мемлекет басшысы қойған ауқымды міндеттер тұр. Маңыздысы – тек өндіріс көлемін ұлғайту ғана емес, сонымен бірге тұрақты, тиімді және бәсекеге қабілетті ауыл шаруашылығы жүйесін қалыптастыру.
Биыл шаруалар 1 трлн теңге көлемінде жеңілдетілген қаржыландыруға қол жеткізген. Бұл аталған сала үшін рекордтық көрсеткіш деуге болады. Келесі жылғы көктемгі егін егу жұмыстарын қаржыландыруға өтінім қабылдау 1-қазаннан басталды. Бұл шаруаларға жаңа маусымға алдын ала дайындалуға және барлық қажетті жұмысты уақтылы жүргізуге мүмкіндік береді.
Жыл басынан бері «Даму» қоры 230 млрд теңге сомасына 1300 кепілдік берген. Бұл тетіктің арқасында жеткілікті кепіл мүлкі жоқ фермерлер де несие алып, жаңа жобаларды іске асырған.
«Мемлекеттік қолдауға бөлінген әрбір теңге нақты нәтиже беруі тиіс. Яғни, жаңа жұмыс орындарын ашуға, ауыл тұрғындарының табысын арттыруға және фермерлердің тұрақты дамуын күшейтуге бағытталуы қажет. Тек осылайша аграрлық саланың сапалы өркендеуіне қол жеткізуге болады», — деді министр.
Сурет: Agrotrend.kz
