Облыс әкімі Берік Уәлидің төрағалығымен ауыл шаруашылығын дамыту мәселелері бойынша жиын өтті. Оған тиісті басқарма басшылары, ал қала-аудан әкімдері бейнережимде қатысты. Отырыста Мемлекет басшысының 2024-2028 жылдарға арналған ауыл шаруашылығының жалпы өнім көлемін екі есеге ұлғайту жөніндегі тапсырмасына сәйкес әзірленген өңірлік кешенді жоспардың орындалу барысы қаралды. Бұл туралы облыс әкімдігінің баспасөз қызметі хабарлады.
Ауыл шаруашылығы басқармасының басшысы Ертай Қуанбаев Абай облысының ауыл шаруашылығын дамытудың 2026-2028 жылдарға арналған жаңа моделін таныстырды. Даму моделі ет кластерін құру, сүтті-тауарлы фермаларын салу, ет бағытындағы құс шаруашылығын дамыту және суармалы егіншіліктің әлеуеті сияқты бағыттарды қамтиды.
“Жаңасемей ауданында қуаттылығы жылына 12,6 мың тонна ет өндіретін комбинат құрылысы жүріп жатыр. Облыс бойынша 65 мың басқа арналған 12 бордақылау алаңы мен 9 сүт фермасын құру жоспарланып отыр. Сонымен қатар, өңірде құс етін өндіру көлемін қосымша 15 мың тоннаға арттыру көзделуде. Су саласын дамытуға арналған кешенді жоспар аясында 6 жаңа су қоймасы салынып, 31 мың гектар суармалы жер айналымға енгізіледі”, — делінген әкімдік таратқан ақпаратта.
Жиын қорытындысында аймақ басшысы осы салаға жауапты орынбасары Думан Оспановқа, аудан және қала әкімдіктеріне, жауапты басқармаларға ауыл шаруашылығына инвестиция тарту, қой шаруашылығын дамыту, суармалы жерлерді ұлғайту, бұрынғы су арналарын қалпына келтіру бойынша нақты тапсырмалар берді. Агроөнеркәсіп кешені саласына екінші деңгейлі банктердің инвестициялары мен кредиттерін тарту жұмысын жандандыруды жүктеді.
«Облыс үшін ауыл шаруашылығы саласын дамыту өте маңызды. Себебі, дамыған ауыл шаруашылық саласы біздің өңірдің азық-түлік қауіпсіздігінің нақты кепілі. Облысымыздың әлеуеті зор. Бесқарағай, Бородулиха аудандары сүт кластерін дамыту бойынша әлеуетті инвесторларды тарту жұмысын қолға алулары қажет. Өйткені, бұл аудандар қалаға жақын, жайылымдық жерлері жеткілікті. Аягөз, Үржар, Мақаншы аудандарына құс фабрикаларын салудың маңызы зор. Өйткені, «Аягөз-Тачен» бағытындағы темір жол ашылғанда үлкен мүмкіндіктер пайда болмақ. Облысымыздың ауыл шаруашылық әлеуетін тиімді пайдаланғанымыз жөн. Сондықтан бұл бағыттағы жұмысты күшейтуіміз керек», — деді облыс әкімі.
Сурет: облыс әкімдігі
