Батыс Қазақстан облысының орталығы Орал қаласында «Ауыл» партиясының және аймақ әкімдігінің ұйымдастыруымен қой шаруашылығына арналған «AUYL FEST» бірінші халықаралық этомәдени фестивалі өтті.
Фестиваль аясында қой шаруашылығына арналған кеңес болды. Оған Батыс Қазақстан облысының әкімі Нариман Төреғалиев, Мәжіліс депутаты, «Ауыл» партиясының төрағасы Серік Егізбаев, Қазақстан Республикасы Премьер-Министрінің кеңесшісі Ералы Тоқжанов, ҚР Парламенті Мәжілісінің депутаты Қарақат Әбден, ҚР Ауыл шаруашылығы вице-министрі Аманғали Бердалин және саланың басқа да басшылары мен фермерлер қатысты.
Кеңесте отандық сарапшылармен қатар Ресей Федерациясы, Қытай Халық Республикасы, Венгрия, Франция және Иран Ислам Республикасынан келген қонақтар, ғалымдар мен ауыл шаруашылығы саласының мамандары баяндама жасады.
Іс-шара аясында қой шаруашылығы өнімдерінің сапасын арттыру, жаңа технологияларды енгізу, мал шаруашылығындағы инновациялық тәсілдер, экспорттық әлеуетті кеңейту бағыттары кеңінен талқыланды.
Қой көрмесінде қазақтың байырғы «Еділбай» қой тұқымы көпшілік назарына ұсынылды. Әсіресе «Бірлік» асыл тұқымды мал зауыты әкелген қошқарлар ірілігімен елдің ықыласына бөленді. «Еділбай» қойының кез келген климатқа төзімділігі, қанының тазалығы насихатталды. Батыс Қазақстан осы қой тұқымының отаны саналғанмен, еліміздің барлық аймағына кең таралған. Ендігі мәселе – осы қой тұқымын одан әрі дамыту, сапасын арттыру, өнімділігін жоғарылату. Шөлге де, шөлейтке де төзімді Еділбайдың санын көбейту де күн тәртібінде тұр. Бұған ғалымдар ғана емес, шаруалар да мүдделі болу керек. Алқалы жиында осы бағытта кешенді шаралар атқарылу керектігі сөз болды.
Қой шаруашылылығы ғылымына еңбек сіңіріп жүрген ғалым Наржан Жұмаділлаев отандық жаңа «Байсары» қой тұқымын таныстырды. Еділбай, Гиссар, Арашан және Ауған қой тұқымдарын біріктіру арқылы осы Байсары қойы шыққанын және бұл тұқымның өнімділігі жоғары екенін айтты. Байсарының 1,5 жасар қошқары 110 мың долларға сатылғанын да тілге тек етті.
Айта кетейік, «AUYL FEST» бірінші халықаралық этомәдени фестивалінің басты мақсаты – ауыл шаруашылығы саласындағы ынтымақтастықты нығайту, заманауи технологияларды енгізу арқылы отандық қой шаруашылығының бәсекеге қабілеттілігін арттыру.
Сурет: Agrotrend.kz
