Қостанай облысында екінші күн «Jańa Dala / Qarqyn ‘2025» халықаралық ауыл шаруашылығы көрмесі өтіп жатыр. Оған әлемнің 20 елінен 100-ге жуық компания қатысуда.
Орақ науқаны қарсаңында дәстүрлі түрде өткізілетін бұл салалық іс-шарада шетелдік және отандық агробизнес өкілдері заманауи ауыл шаруашылығы технологиялары мен жоғары өнімді техниканың мүмкіндіктерін, мал шаруашылығы мен селекция саласындағы жетістіктерін, сондай-ақ ветеринария, өсімдіктерді қорғау және органикалық егіншілік бағытындағы инновациялық әзірлемелерді таныстыруда.
Көрме қатысушылары мен қонақтарының қатарында машина жасау кәсіпорындары, қазақстандық және шетелдік ауыл шаруашылығы техникасы мен жабдықтарын өндірушілер мен жеткізушілер, егіншілік пен өсімдік шаруашылығы саласындағы аграрлық ғылым өкілдері, асыл тұқымды мал шаруашылығының мамандары, сондай-ақ облыстық әкімдік құрылымдарының, қаржы ұйымдарының және қоғамдық бірлестіктердің өкілдері бар.
«2027 жылға дейін Қостанай облысында жалпы құны 383 млрд теңгені құрайтын 93 инвестициялық жобаны іске асыру жоспарланған. Оның ішінде мал шаруашылығы саласында – 51 жоба, егіншілік бойынша – 23 жоба, ауыл шаруашылығы өнімдерін өңдеу саласында – 19 жоба. Бұл жобалар аясында 4,4 мың жаңа жұмыс орнын ашу көзделуде. Биыл өңірде жалпы құны 52,5 млрд теңге болатын 36 жобаны іске қосу жоспарланып отыр. Жыл соңына дейін Алтынсарин, Меңдіқара және Федоров аудандарында 4 ірі тауарлы сүт фермасы пайдалануға беріледі», — деді «Jańa Dala / Qarqyn ‘2025» Дала күнінің ресми ашылуында Қостанай облысы әкімінің орынбасары Арман Абенов.
Оның айтуынша, биыл облыстың АӨК дамытуға 207 млрд теңге бөлінген. Бұл 2024 жылмен салыстырғанда 1,2 есе көп. Көктемгі дала жұмыстарына жеңілдетілген несие беру аясында 62 млрд теңге қаржы бөлінді.
«Басты міндет – бюджет қаражатын тиімді пайдалану, салынған инвестициялардан барынша қайтарым алу, кәсіпорындардың тұрақты жұмысын қамтамасыз ету және ауыл шаруашылығы өнімінің көлемін арттыру», — деп атап өтті облыс әкімінің орынбасары.
Сурет: Р.Тасболат
