Агроөнеркәсіп кешенін дамытудың 2025-2027 жылдарға арналған Жол картасы аясында Қазақстанда жалпы сомасы 3,4 трлн теңгеге 683 инвестициялық жобаны іске асыру жоспарланған. Бүгінгі таңда Түркістан, Алматы және Қостанай облыстарында 50-ден астам жоба пайдалануға берілді. Бұл туралы Ауыл шаруашылығы министрлігінің баспасөз қызметі хабарлады.
2025 жылдың бірінші жартыжылдығының қорытындысы бойынша АӨК негізгі капиталына тартылған инвестициялар көлемі 616,6 млрд теңге. Оның 442,7 млрд теңгесі ауыл шаруашылығы мен балық шаруашылығына, 104,2 млрд теңгесі тамақ өнімдерін өндіруге, 69,7 млрд теңгесі сусындар өндірісіне бағытталды.
«Салаға 2 трлн теңгеден астам инвестиция тарту жұмыстарын жандандыру қажет. Әкімдіктер үшін Жол картасының орындалуын және 2025 жылға жоспарланған жобалардың іске қосылуын қамтамасыз ету маңызды», — деді Ауыл шаруашылығы министрі Айдарбек Сапаров ведомствода өткен кеңесте.
Биыл инвестиция тарту бойынша ең үздік көрсеткіштерді Шымкент, Алматы, Ақтөбе, Солтүстік Қазақстан, Түркістан, Алматы, Ақмола облыстары және Абай облысы көрсетіп отыр. Ал Астана, Шығыс Қазақстан, Атырау, Маңғыстау және Ұлытау облыстарында қаражатты игеру деңгейі төмен болып тұр.
Сурет: облыс әкімдігі
