Астанада өткен BaiQymyz гастрофестивалінде Абай облысының Саржал ауылы бас жүлдені жеңіп алды. Облыс әкімі Берік Уәли Саржал ауылын жеңісімен құттықтады.
«Бұл – өңіріміз үшін үлкен мәртебе әрі әділетті жеңіс! Себебі, Саржалдың сары қымызы – көптен бері ел аузында жүрген, талай жұрттың таңдайын қақтырған табиғи өнім. Бірақ бүгінгі жеңіс тек дәм арқылы емес, әділ де ашық дауыс беру нәтижесінде анықталды. Демек, бұл – халықтың өзі берген әділ баға! Ұлы Абайдың 180 жылдығы қарсаңында Абай жерінің осындай рухани әрі мәдени жеңіске жетуі – біз үшін символдық мәнге ие. Бұл тек бір байқаудың жүлдесі емес, өңіріміздің әлеуетін, дәстүрге деген құрметін, табиғи өнімге адалдығын көрсеткен айшықты оқиға. Алдағы уақытта осы жетістік ішкі туризмді дамытуға, өңірлік бренд ретінде ұлттық тағамдарымызды ілгерілетуге жаңа серпін береді деп сенемін. Жеңіске үлес қосқан барша азаматтарға, әсіресе қымыз өндірушілерге, ұйымдастырушыларға және дауыс берген ел-жұртқа алғысымды білдіремін! Жеңіс құтты болсын!», – деп жазды Берік Уәли әлеуметтік желілердегі парақшасына.
Қазақстанда алғаш өткен BaiQymyz фестиваліне еліміздің барлық өңірінен 50-ден астам қымыз өндіруші қатысты. Фестиваль қымыз ішу мәдениетін жаңғыртуға, фермерлікті дамытуға және жергілікті брендтерді танымал етуге бағытталған.
Келушілер қымыздан дәм татып, оны дайындаудың бірегей технологиясымен де танысты. Ұйымдастырушылардың мәліметінше, 40 мыңнан астам елорда тұрғыны мен қонағы 30 тоннадан астам ұлттық сусыннан дәм татқан.
Қымыздан дәм татудан бөлек, келушілер ұлттық тағамдардан ауыз тиіп, фольклорлық қойылымдарды тамашалады, қолөнер жәрмеңкесіне, концерттерге қатысып, жылқы көрмесін тамашалады.
