Жетісу облысының Алакөл ауданында «ZHERSU» инвестициялық-өнеркәсіптік корпорациясы мен «Ангус» палатасы ұйымдастырған LEPSI 2025 халықаралық мал шаруашылығы көрмесі өтті. Оған АҚШ, Ресей, Қытай, Түркия және басқа да бірқатар елдерден мал шаруашылығы саласының сарапшылары мен мамандары қатысты.
Екі күнге жоспарланған көрмеде асыл тұқымды төрт түлік көпшілік назарына ұсынылды. Тәжірибелі мамандар мал сапасын арттырудың, шаруашылықтарды дамытудың тәсілдерін баяндады. Шет елдерден және еліміздің түкпір-түкпірінен келген шаруа қожалық иелері тәжірибелерімен бөлісті. Мал шаруашылығының үздік мамандарына, бірқатар шетелдік сарапшы қонақтарға Ауыл шаруашылығы министрлігінің және облыс әкімдігінің Алғыс хаттары мен Құрмет грамоталары табысталды.
«ZHERSU» инвестициялық-өнеркәсіптік корпорациясының негізін қалаушы, ірі кәсіпкер, белгілі меценат, ұлт жанашыры Бауыржан Оспановты сөзге тартып, LEPSI 2025 халықаралық мал шаруашылығы көрмесінің мақсаты туралы сұраған едік.
«Қазақстанның ауыл шаруашылығы саласы дұрыс бағытта әрі жылдам дамыса деген тілегіміз бар, оң нәтижелер болса дейміз. Ауыл шаруашылығы өзі егіншілік, ет, сүт бағыттары болып түрлі салаларға бөлінеді. Қазір ұзақмерзімге берілетін қаржы аз, несиелердің пайызы өте жоғары. Ал бар қаражатты қалай алу керек, техниканы лизингке қалай алуға болады деген сияқты мәселелер де осында жиналған жұрт білуі тиіс. Сосын тағы бір айта кететін ең маңызды мәселе, асыл тұқымды малдың санын көбейтуіміз керек. Тауарлы малды баққанмен онда ешқандай сапа болмайды. Сондықтан төрт түлікті асылдандырып, сапалы мал өсіріп отырған шаруашылықтар, басқа да мал шаруашылығымен айналысамын деген азаматтар өзара тәжірибе алмасады. Асыл тұқымды мал шаруашылығын қарқынды түрде дамытпаасақ сапалы мал болмайды, онда сапалы ет те болмайды деген сөз. Өзімізде сапалы ет болмаса, шет елдерге экспортқа шығара алмаймыз. Бәсекеге қабілетті бола алмаймыз. Сондықтан, мал шаруашылығымен айналысатын азаматтар пікір алмассын, тәжірибе алмассын деген мақсатпен ұйымдастырып жатырмыз. Шет елдерден де мамандар келді. Олар техникаларын, технологияларын әкеліп таныстырып жатыр. Олардың ішінен де үздігін, мықтысын таңдап алуға мүмкіндік бар«, — дейді Б.Оспанов.
Бауыржан Оспанов мырзадан «Еділбай» қой тұқымының ерекшелігін сұрадық.
«Еділбай – ата-бабамыздан қалған ерекше қой тұқымы. Оның осал тұсы мүлде жоқ деуге болады. Мықтылығын, табысты мал екенін жұртқа жеткіздік. Ары қарай әлемге өзі-ақ тарап кетті. Қысқа ғана уақыттың ішінде шет елдерден келіп қызығушылық танытып жатыр. Меринос, дорпер және басқа да қой тұқымдарын әкеліп, өсіріп көрдік. Бірақ осылардың ішінде ең сұранысқа ие Еділбай қойы болып тұр, соның етін сұрап жатыр. Бұл дегеніңіз үлкен нәтиже. Бұрындары өз еліміздің ішінде құйрық майды ешкім алғысы келмейтін. Қазір етінен қымбат бағада сатылады. Яғни, жақсы нәтиже бар деген сөз. Бұл Еділбай мол табыс әкелетін қой тұқымы. Соны көпшілік түсінді, қазір сұраныс үлкен«, — дейді Бауыржан Кеңесбекұлы.
Шаруашылықтардың көрмеге әкелген «Еділбай» асыл тұқымды қошқарларын бағалау рәсімі болды. Бейтарап комиссия олардың жасына қарай салмағын, дене бітімін саралап, жеңімпазды анықтады. Қазақтың байырғы «Еділбай» асыл тұқымды қойы өсімталдығымен, төзімділігімен, етінің сапасымен ерекшеленеді әрі жоғары бағаланады. Көрмеге келген қой шаруашылығы саласының сарапшылары да Қазақстан үшін Еділбайға жетер қой тұқымы жоқ екенін растап отыр.
«Ангус» пен «Герефорд» асыл тұқымды бұқаларын АҚШ-тан келген сиыр тұқымын бағалаудың білікті сарапшы маманы Джон Хаскел бағалады. Оның айтуынша Қазақстанның асыл тұқымды ірі қара өсіру бағыты жыл өткен сайын дамып келеді. Көрмеге қойылған жас бұқалар бірінен бірі өтеді. Осы көрмеде Ақмола облысынан келген «Kazbeef LTD» ЖШС әкелген Маркиз атты 17 айлық бұқа абсолютті чемпион атанды. Көрмедегі Еділбай қошқарлары мен Ангус, Герефорд бұқалары аукцион арқылы сатылды. Енді олар басқа өңірдің отарлары мен табындарына қосылады.
Көрме қатысушылары мәр-мәр еттен дайындалған стейктен, түйе сүтінен, сиыр сүтінен және Еділбай қойының сүтінен әзірленген түрлі ірімшіктерден дәм татты.
Көрме қазақша күрес және аламан бәйге спорттық іс-шараларымен аяқталды. Біз де Лепсінің көркем табиғатына көз қанықтырып, түрлі сала мамандарымен сұхбаттасып, Жетісу жерінен олжалы қайттық.
Сурет: Agrotrend.kz
