Сүтті мал шаруашылығы саласындағы ауқымды инвестициялық жобаны «Зенченко и К» сенім серіктестігі 2024 жылдан бастап Қызылжар ауданының Новоникольское ауылында іске асыруда. 8 мың бас ірі қара малға арналған кешеннің құны 9 млрд теңге. Бұл туралы Ауыл шаруашылығы министрлігінің баспасөз қызметі хабарлады.
Бұл сүт кешені Қазақстанда ғана емес, бүкіл Орталық Азиядағы ең ірі кешен болмақ. Толық қуатында ол жыл сайын шамамен 26 000 тонна сүт өндіретін болады.
Кешеннің жобалық құрылымына 7 ғимарат кіреді. Олардың ішінде әрқайсысы 1 280 басқа арналған 3 сиыр қорасы бар. Кешеннің ерекшелігі – бір уақытта 90 бас сиырды сауатын жоғары технологиялы «карусель» типті сауу қондырғысы болады. Бұл сағат сайын 700 басқа дейін қызмет көрсетуге мүмкіндік беріп, өндіріс прорцесінің тиімділігін арттырады.
Жобаны жүзеге асыру – елдің азық-түлік қауіпсіздігін нығайтуға, ішкі нарықты жоғары сапалы сүт өнімдерімен қамтамасыз етуге, жаңа жұмыс орындарын ашуға және ауылдық инфрақұрылымды дамытуға ықпал етеді.
2025 жылы өңірде 17 млрд теңге сомасына 22 инвестициялық жобаны қаржыландыру жоспарланған. Олардың ішінде жалпы саны 7 000 басқа арналған 11 тауарлы сүт фермасы бар. Бұл жобалар жылына 47 000 тоннаға дейін сүт өндіруге қауқарлы.
Сурет: АШМ
