Қызылорда облысының Жалағаш ауданында Сырдария өзенінің бассейніндегі ирригациялық және дренаждық жүйелерді қайта жаңарту жұмыстары аяқталды. Барлығы 1362,2 км канал қайта жаңартылды, 14 617 шағын гидротехникалық құрылым ауыстырылды және салынды, 327,86 км коллектор және 151 бақылау ұңғымасы қалпына келтірілді. Бұл туралы Су ресурстары және ирригация министрлігінің баспасөз қызметі хабарлады.
«Соның нәтижесінде бүгінгі күні толық егілген жалпы көлемі 15,1 мың гектар ауыл шаруашылығы алқаптарының сумен қамтамасыз етілуі мен мелиорациялық жағдайы жақсарды. Жобаны іске асыру жыл сайын оның шығынын 30%-ға азайту есебінен 95 млн текше метрге дейін суды үнемдеуге мүмкіндік береді», — деп хабарлады министрлік.
Су ресурстары және ирригация министрі Нұржан Нұржігітов атап өткендей, Дүниежүзілік банкпен бірлесіп іске асырылатын ирригациялық және дренаждық жүйелерді жетілдіру жөніндегі жобаның екінші кезеңі аясында жұмыстар жүргізілді.
«Осыған ұқсас жұмыстар Алматы, Жамбыл және Түркістан облыстарында 105 мың гектардан астам жерді сумен жабдықтауды жақсарту үшін жүргізілуде. Бүгінгі таңда осы жобалардың барлығын іске асыружұмыстары 86%-ға аяқталды, 79,15 мың га алқапқа су беру жақсарды, жылына 201,8 млн текше метр суды үнемдеуге жағдай жасалды», — деді министр.
Жергілікті шаруа қожалықтары жұмыс нәтижелерін оң бағалады.
«Каналдарды тазарту, шлюздерді орнату және басқа жұмыстар арқылы сумен жабдықтау жағдайлары 35-40% жақсарды. Жүйе фермерлерге судың аздығымен күресуге көмектеседі. Жалпы, нәтижелер өте жақсы», — деді жергілікті шаруа қожалықтарының бірінің агрономы Сұлтанбек Үсейінов.
Сурет: Су ресурстары министрлігі
