Қытайлық Xinjiang Lihua (Group) Co., Ltd. компаниясы Түркістан облысындағы TURAN арнайы экономикалық аймағының аумағында мақта-тоқыма кластерін құру жобасына 200 млрд теңгеден астам инвестиция салуды жоспарлап отыр. Бұл туралы ҚР премьер-министрінің баспасөз қызметі хабарлады.
Жоба мақтаны өсіруден бастап иірілген жіп, мата, киім түрінде дайын тоқыма өнімдерін шығаруға дейінгі толық циклді қамтиды. Егіс алқаптарына 50 мың гектардан астам жер бөлінді. Онда он зауыт салу жоспарлануда, оның ішінде төртеуі – егіс алқаптарының жанында мақта өңдеу, екеуі – заманауи су үнемдеу технологияларын қолдана отырып тамшылатып суару жүйелерін өндіру, сондай-ақ тігін және бояу-әрлеу фабрикасын қоса алғанда төрт тоқыма өндірісі болады.
4 мыңнан астам жұмыс орнын құру жоспарланған, ондағы 3 мың жұмыс орны тұрақты болады.
Бүгінгі таңда кластердің қажеттіліктерін қамтамасыз ету үшін ПВХ құбырларын шығаратын зауыт іске қосылып, тоқыма фабрикаларының құрылысы басталды. Инвестор суару инфрақұрылымының (каналдар желісі, сорғы станциясы) құрылысын жүргізеді.
Xinjiang Lihua (Group) Co., Ltd. директорлар кеңесінің төрағасы Чжан Цихай ҚР Премьер-министрі Олжас Бектеновпен кездесуде биыл қазан айында дайын өнімнің алғашқы өндірісін іске қосу жоспарланып отырғанын хабарлады. Ол сондай-ақ Қазақстандағы қолайлы инвестициялық ахуалды және жоба үшін өңірдің қолайлы климаттық ерекшеліктерін атап өтті.
Олжас Бектенов өз кезегінде іске асырылып жатқан жобаның маңыздылығын және экономиканы дамытудағы кластерлік тәсілдің маңыздылығын айтты. Түркістан облысы – Қазақстанның мақта өсіретін жалғыз өңірі.
«Мемлекет басшысы экономиканы әртараптандыру және нақты секторға инвестициялар тарту міндетін қойды. Мақта-тоқыма кластерін құру өнімнің қосылған құнын арттыруға, қайта өңдеуге және елдің экспорттық әлеуетін арттыруға баса назар аудара отырып, ауыл шаруашылығы өндірісін дамытуға ықпал етеді. Үкімет өз тарапынан қажетті қолдау көрсетеді», — деді Олжас Бектенов.
Xinjiang Lihua (Group) Co.Ltd — Қытайдың мақта өнеркәсібіндегі ең ірі компаниялардың бірі. Шыңжаң компаниясы Қытайдың 500 ірі ауыл шаруашылық кәсіпорындарының рейтингінде 55-ші орында, мақтаны кешенді өңдеуге және толық өндірістік циклды басқаруға маманданған. Яғни тұқым өсіруден бастап тоқыма өнімдерін шығаруға дейінгі жұмыстарды толық атқарады.
