Мемлекет басшысы Қасым-Жомарт Тоқаевтың төрағалығымен өткен Үкіметтің кеңейтілген отырысында Қызылорда облысының әкімі Нұрлыбек Нәлібаев өткен жылы Сыр елінде су үнемдеу технологияларын кеңінен қолдану арқылы ауыл шаруашылығы дақылдарынан мол өнім алынғанын айтты, деп хабарлады облыс әкімдігінің баспасөз қызметі. Былтыр аймақта жарты миллион тоннаға жуық күріш (гектарына 58 центнерден, 496,4 мың тонна) өндірілген.
Ауыл шаруашылығы саласына тартылған инвестиция 2023-жылмен салыстырғанда 32 пайызға артқан. 2025-2029 жылдары жалпы сомасы 57 млрд. теңге болатын 29 жаңа жоба іске қосылады. Соның есебінен 488 жаңа жұмыс орны ашылады деген жоспар бар.
Айта кетейік, Мемлекет басшысының қолдауымен мемлекетаралық келісімдердің нәтижесінде соңғы 2 жылда Арал теңізіндегі су көлемі 4 млрд. текше метрге дейін артты. Бұл балық шаруашылығының дамуына, экологиялық ахуалдың жақсаруына оң септігін тигізуде.
Сурет облыс әкімдігінен алынды
