Ауыл шаруашылығы вице-министрі Азат Сұлтанов Қазақстан аумағында зәйтүн мен банан өсіру жобаларына қатысты пікір айтты, деп хабарлады ҚазАқпарат.
Оның сөзінше, Түркістан облысында мың тоннаға жуық банан өндіруге бағытталған инвестициялық жоба жүзеге асырылды. Бұл Қазақстан Республикасына импортталатын жалпы бананның шамамен бір пайызын құрайды.
«Қазіргі кезде баға конъектурасын, өнімді жеткізу шығындарын ескере отырып, бұл банан құны ішкі нарықтағы бағамен бәсекеге қабілетті болуы мүмкін. Тіпті, елімізде өсірілген осы өнім жылдам сатылып кетеді деген жарнама айтылып жатыр, яғни ірі сауда орындары ірі көлемде алуға мүдделі екен. Мәселен, Ресей Федерациясы біздің климаттық жағдайда жеке компанияның банан сияқты бәсекеге қабілетті өнім өсіруі тәжірибесіне назар аударып отыр», — деді А. Сұлтанов.
Оның айтуынша, Түркістан облысында зәйтүн өсіру жоспары да бар.
«Мұнымен қоса, батыста да зәйтүн ағашын өсіруге арналған инвестициялық жобаны жүзеге асыруды жоспарлап отырмыз. Біз эксперимент жүргіздік, жақсы көрсеткіштер бар», — деді вице-министр.
Сурет: abc.az
