Премьер-Министрдің орынбасары Серік Жұманғарин Павлодар облысына жасаған жұмыс сапары аясында Lactalis Kazakhstan (ФудМастер) компаниялар тобына кіретін «Сүт» АҚ сүт өңдеу зауытында болды, деп хабарлайды primeminister.kz. Зауыт 220 адамды жұмыспен қамтамасыз етіп, тәулігіне өңдеуге 200 тонна сүт қабылдап отыр. Мұнда сүт, айран, май және басқа да өнімдер шығарылады. Шикізат «Киров» ЖШС-нің жеке тауарлы сүт фермасынан және облыстағы басқа да ірі сүт фермаларынан алынады.
«Сүт» АҚ басқарма төрағасы Светлана Таран бұған дейін кәсіпорын шикізаттың шамамен 70%-ын жергілікті өндірушілерден, ал, қалғанын Қазақстанның басқа өңірлерінен сатып алынғанын айтты. Қазір жаңа тауарлы сүт фермаларының іске қосылуына орай жергілікті ірі фермалар 96% сүтпен қамтамасыз етіп отыр. Сонымен қатар зауыт өндіріс қуатын кезең-кезеңмен кеңейтуде. Биылғы үшінші тоқсанда ультрапастерленген сүт өндіру қосымша желісі іске қосылды.
Сонымен бірге вице-премьер Қазақстандағы танымал премиум-класты кеспе өндіретін «КЭММИ GROUP» ЖШС қызметімен танысты. Кәсіпорын жылына 150-ден астам өнім түрі бар 10 мың тонна макарон өндіреді. Ішкі нарықты қамтамасыз етумен қатар, кәсіпорын өнімдерін Қырғызстан, Ресей, Беларусь, Өзбекстан, Моңғолия, Германия елдеріне экспорттайды.
Сурет АШМ сайтынан
