Солтүстік Қазақстан облысында «Ауыл аманаты» бағдарламасының уәкілетті агенті – «Солтүстік» әлеуметтік-кәсіпкерлік корпорациясы өңір тұрғындарынан жалпы сомасы 1,3 млрд теңгеге 134 өтінім қабылдады. Бұл туралы корпорацияның баспасөз қызметі хабарлады.
«Солтүстік» ӘКК» АҚ шағын және орта бизнес саласындағы мемлекеттік бағдарламаларды іске асыру бөлімінің басшысы Талғат Жұмабековтың айтуынша, бүгінгі күнге дейін 43 жоба 477,7 млн теңгеге қаржыландырылған. Қолдау тапқан жобалар қатарында мал шаруашылығы, өсімдік шаруашылығы, туризм, балық өнімдерін өңдеу, жиһаз өндіруге арналған жабдықтар сатып алу және автокөлік жуу орталығын ашу бағыттары бар. Бағдарламаға облыстың барлық аудандарының тұрғындары қатысқан.
Жалпы, Солтүстік Қазақстан облысына республикалық бюджеттен 1,5 млрд теңге бөлінген.
Сонымен қатар, биыл «Ауыл аманаты» бағдарламасына қатысу талаптары өзгертілді. Енді микрокредит алушылар қатарына:
жұмыссыз азаматтар;
жеке кәсіпкер ретінде тіркелмеген өзін-өзі жұмыспен қамтығандар;
қызметін тоқтатқан жеке кәсіпкерлер;
отбасылық кәсіпкерлікте ақысыз жұмыс істейтін тұлғалар;
табысы күнкөріс минимумынан төмен, жеке қосалқы шаруашылықта өнім өндіріп, сатумен айналысатын азаматтар енгізілді.
Микрокредит мақұлданғаннан кейін қарыз алушы міндетті түрде жеке кәсіпкер ретінде тіркеліп, несие шартының бүкіл мерзімінде осы мәртебені сақтауы тиіс. Бизнес қарыз алушы тіркелген елді мекенде жүзеге асырылуы қажет.
Бағдарлама аясында ғимараттар мен тұрғын үйлерді сатып алуға немесе салуға, жеңіл автокөлік алуға, жақын туыстардан ауыл шаруашылығы жануарларын сатып алуға, сондай-ақ көтерме және бөлшек саудамен айналысуға тыйым салынады.
Микрокредиттің ең жоғары сомасы — 2 500 АЕК-ке дейін (10,8 млн теңге). Ауыл шаруашылығы өнімдерін өңдеу және ауыл шаруашылығы кооперативтерін дамыту жобалары үшін — 8 000 АЕК-ке дейін (34,6 млн теңге).
Несие мерзімі ауыл шаруашылығына жатпайтын бизнес үшін 5 жылға дейін, ал ауыл шаруашылығы және өнім өңдеу жобалары үшін 7 жылға дейін. Негізгі қарызды өтеу бойынша 12 айға дейінгі жеңілдік кезеңі қарастырылған.
