SU BEREKE маркалы жаңбырлатып суару машиналарын шығаратын зауытты Шығыс Қазақстан облысының аумағында биыл бірінші тоқсанда іске қосу жоспарлануда. Бұл туралы ҚР Ауыл шаруашылығы министрлігінің баспасөз қызметі хабарлады.
Жаңа зауыт жылына 1000 жаңбырлатып суару машинасын өндіретін болады.
“Осылайша, бұл жоба шетелдік техника өндірушілеріне тәуелділікті азайтуға мүмкіндік береді. Кепілдік және сервистік қызмет көрсету қарастырылған. Өнімдер Орталық Азия мен ТМД нарықтарына да бағдарланатын болады», — деп хабарлады министрлік.
Ведомствода еске салғандай, ADAM компаниялар тобы 2024-жылы SU BEREKE брендімен айналмалы типтегі жаңбырлатқыш машиналардың алғашқы отандық өндірісін іске қосты. 2024-жылы СТ-KZ сертификаты және ЕАЭО сәйкестік сертификаты алынды.
30 машина шығарылды, оның 7-і Шығыс Қазақстан облысының егістіктеріне жиналды.
Биыл ADAM машиналардың жаппай өндірісін жолға қоюды жоспарлап отыр.
Жоба суару мәселесін және қол жетімді техниканың жетіспеушілігін шешуге бағытталған: жаңбырлатып суару машиналары суды егістіктерге біркелкі жеткізуге мүмкіндік береді және шығынды 30-40%-ға азайтады», — делінген хабарламада.
Сурет: ашық ақпарат көзінен
