Қазақстан ЕАЭО шеңберінде өзінің тамақ өнеркәсібін қорғауды күшейтуге тиіс. Бұл туралы президент Қасым-Жомарт Тоқаев Ұлттық құрылтайдың V отырысында айтып, үкіметке ұлттық мүдделерді қорғауды күшейтуді тапсырды.
«Қазақстанның ауыл шаруашылығы өнімдерін өңдеу секторының шамадан тыс қысымға ұшыраған жағдайын қалыпты деп айтуға болмайды. Отандық тамақ өнеркәсібінің өкілдері ЕАЭО-ға қатысушы мемлекеттердің субсидияланатын тауарларының қысымымен өндірісті қысқартуға мәжбүр. Ал біз үшін бұл азық-түлік қауіпсіздігі мәселесі», – деді Қасым-Жомарт Тоқаев.
Ол үкімет ұлттық мүдделерді қорғау үшін неғұрлым белсенді жұмыс істеуі керегін, өзара мүдделердің әділ теңгерімін тауып, Қазақстанның ұстанымын шебер және дәлелді түрде қорғауы қажет екенін атап өтті.
«Тек осылай ғана біз экономикамызды халықаралық нарықта бәсекеге қабілетті ете аламыз», — деді Президент.
Сурет: Ақорда
