Польшада жүк көлігін жүргізетін 30 мың маман жетіспейді, деп хабарлады 24KZ. Жергілікті жұмыспен қамту қауымдастығы келтірген дерек осындай екен. Әсіресе оңтүстік және батыс аймақтарда мәселе өткір тұр. Билік түйткілді шешу үшін жыл сайын жүк көлігі жүргізушілеріне алыс-жақын елдерге ашық вакансия жариялайды. Польшада трактор жүргізуге Азия елдерінен адамдар көп барады. Қазақстан мен Қырғызстаннан да өтініш білдірушілер қарасы қалың көрінеді. Кейінгі дерекке сүйенсек, қазір Польшада 160 мың маман сырттан келіп жұмыс істейді екен. Олардың жалақысы шамамен 2 100 доллар, бұл біздің ақшамен 1 млн 60 мың теңге.
«Кадр тапшылығы тек көлік және логистика саласында ғана емес, ауыл, орман, балық шаруашылығы мен құрылыс секторында да қатты сезіледі. Жеміс жинау, кірпіш қалау, дәнекерлеу, балық аулау сияқты маусымдық жұмыс жеткілікті. Бірақ маман жоқ. Қазір мұндай жұмыстарды көбіне қақтығыстан қашып келген украиналықтар атқаратын болған», — дейді Польша жұмыспен қамту қауымдастығының өкілі Мацей Вроньски.
Сурет: Agrotrend.kz
