Павлодар облысы еліміздегі егіс алқаптарының көлемі бойынша 4 орында. Жалпы егістік көлемі 1,6 млн гектар алқаптың 928,5 мың гектарына дәнді және бұршақты, 374,3 мың гектарына – майлы, 281,2 мың гектарына – мал азығы дақылдары, қалғанына көкөніс егілді. Бүгінгі таңда облыста дәнді дақылдар мен көкөністердің 99%-ы, картоп толық жиналды, майлы дақылдарды жинау жұмыстары басталды, деп хабарлады primeminister.kz.
Премьер-Министрдің орынбасары Серік Жұманғарин Павлодар облысына жасаған жұмыс сапары аясында «Agro-Trade PV» ЖШС-нің сыйымдылығы 10 мың тонна көкөніс сақтау қоймасы мен 1,2 мың мал басына арналған тауарлы сүт фермасына барды. Аграрлық несие корпорациясының қолдауымен 2022 жылы салынған тауарлы-сүт фермасы жылына 4 млн литр сүт өндіреді. Одан соң шикізатты қайта өңдеу үшін жергілікті сүт өңдеу зауытына жібереді.
Кәсіпорын мал азығын және картоп өсірумен айналысады. Вице-премьер көкөніс қоймасының базасында өңірдегі ірі фермерлермен кездесті. Шаруаларды 4-5-ші класты астықты форвардтық сатып алу бағасы қызықтырды.
«Біз бидай өсіреміз, биыл егіннің басым бөлігі – 4-5-ші класты. Азық-түлік корпорациясы 3-ші класты бидай бағасын жариялады. Қазір 4-5-ші кластар бағасында ретсіздік бар, тоннасын 30-40 мың теңгеден ұсынуда. Азық-түлік корпорациясының бағасын білгіміз келеді», деді «БиК» ШҚ директоры.
Серік Жұманғарин шаруалармен әңгімелесу кезінде қазірдің өзінде сатып алу бағасы анықталғанын, Азық-түлік корпорациясы оны жақын күндері жариялайтынын жеткізді. Атап айтқанда, дәнінде 21-22% ақуызы бар 4-ші класс үшін тоннасына 75 мың теңге деңгейінде баға бекітілді.
Сондай-ақ кездесуде вице-премьер шаруаларға биыл 3 млн тоннаға жуық астықты Қытайға экспорттау жоспарланып отырғаны үлкен әлеует екенін атап өтті. Сонымен қатар ол мал шаруашылығын дамытуды қолдаудың алдағы мемлекеттік бағдарламасы туралы тоқталып, бұл бағытта кәсіпкерлікті дамытуға көңіл бөлуге шақырды.
«Біз келесі жылы мал шаруашылығын мемлекеттік қолдаудың ауқымды бағдарламасын іске қосуды, бірінші кезекте, аустралиялық әдіспен жүзеге асырылатын жобаларды қолға алуды жоспарлап отырмыз. Бұл ретте суармалы егін шаруашылығын дамытуға да қолдау көрсетеміз. Сонымен қатар Ертіс өзені мен Қ. Сәтбаев атындағы каналдың әлеуеті Павлодар облысында 200 мың гектарға жуық жерді суармалы алқапқа айналдыру жобаларын іске асыруға мүмкіндік береді. Отандық жаңбырлатып суаратын қондырғылар өндірісінің болуын және мал шаруашылығын дамыту жөніндегі болашақ жобаларды ескере отырып, біз өңірге мемлекет жеңілдетілген несие беру арқылы қолдау көрсететін суармалы жерлерді дамыту жөніндегі бағдарламаны әзірлеуді ұсындық», — деп атап өтті Серік Жұманғарин.
Сурет primeminister.kz сайтынан
