Шығыс Қазақстан облысының Күршім ауданына қарасты Маралды ауылында топырақ пен судан алынған сынамалар негізгі бақылау көрсеткіштері бойынша тексерілді, деп хабарлайды Altainews.kz.
Зерттеу нәтижесіне сәйкес, рН деңгейі, қалқымалы заттар, аммоний, мұнай өнімдері, цианид, ауыр металдар және басқа да элементтер бойынша шекті рұқсат етілген мөлшерден асып кету фактісі тіркелмеген.
Еске сала кетсек, ШҚО әкімі Нұрымбет Сақтағановтың тапсырмасымен сегіз сиырдың өліміне байланысты облыстық және аудандық деңгейдегі ветеринариялық және экологиялық қызмет мамандары Маралды ауылында тексеріс жүргізген болатын. Олар жақын маңдағы бұлақтардан, топырақтан және фабрика аумағынан сынамалар алып, зертханалық талдауға жіберді.
«Қазір түрлі жалған ақпарат тарап жатыр. Біз әр ақпараттың шындыққа сәйкестігін тексерудеміз. Егер қандай да бір заңбұзушылықтар анықталса, жауаптылар заң шеңберінде жазаға тартылады. Ең бастысы — халықтың қауіпсіздігі», — деді облыс әкімінің орынбасары Дархан Сапанов ауыл тұрғындарымен кездесуде.
Кездесуге фабрика өкілдері де қатысып, диалог орнатудың маңыздылығын атап өтті. Ауыл ақсақалдары халық пен кәсіпорын арасында өзара түсіністік болуы қажеттігін жеткізді.
Өлген мал иелеріне ветеринариялық мамандарға жүгініп, мал шығынын ресми түрде тіркеу ұсынылды. Қазіргі уақытта барлық зертханалық сараптамалар жалғасып жатыр. Малдың нақты өлу себептері толық анықталғаннан кейін ғана қорытынды шешім жария етіледі.
Сурет: облыс әкімдігі
