Мақаншы тұрғыны түйеқұс өсіріп отыр. Кәсіпкер сүйекті, алып құстың екеуін сегіз жыл бұрын сатып алған, деп хабарлайды 24kz. Кәсіп иесінің айтуынша, түйеқұсқа күтім жасау – тек табыс көзі ғана емес. Оның сүйікті ісіне айналған. Кәсіпкер алдағы уақытта түйеқұсты көбейтіп, үлкен шаруашылық құруды жоспарлап отыр.
Түйеқұстарды төрт түлікпен қатар бағып келе жатқан Ержан Төлеген бұл іспен айналысқанына сегіз жылдан асқанын айтады. Бүгінде екі ірі құсты бағып отырған ол үшін бұл – жай ғана хобби емес, күнделікті өмірінің бір бөлшегіне айналған іс. «Көпшілікке таңсық көрінгенімен, түйеқұсты күтіп-баптау аса қиын емес», — дейді кәсіпкер. Оның айтуынша, құстар жергілікті климатқа бейімделіп кеткен және арнайы жағдай талап етпейді.
«Түйеқұс хобби ретінде алдық. 2017 жылда алып келдік. Енді ол Африкада болғандықтан, мұнда қалай болады екен деп. Қыста да жүре береді. Төзімді екен. Кәсіп емес бұл, хобби ретінде өзіміз ұстап отырмыз. Шыдамды, қыста да, біз жақтың суығында да шыдап жүретін құс екен», — дейді шаруа қожалығының иесі Ержан Төлеген.
Бүгінде Ержанның шаруа қожалығында 500 бас сиыр, 100-ден астам қой бар. Мұнда 15 адам жұмыс істейді. Жұмысшылар екі түйеқұсқа күніне бірнеше мәрте азық береді. Олар азық таңдамайды, тамағынан өтетінді талғамай жұта береді. Ағаштың діңгектері, шөп, жапырақ, түрлі жәндіктерді жейді. Олар тұратын жер кең болса, азық та мол болады.
Жалпы Абай облысында 10 мыңнан аса шаруа қожалығы бар. Оларға мемлекет тарапынан қолдау жасалып жатыр. Мәселен биыл шаруаларға 14 млрд теңге субсидия беру жоспарланған.
«Көктемгі егіс жұмыстары басталып жатыр. Оған Үкіметтен дизель отыны таратылып жатыр. Былтырғы жылы егістікке 13-14 мың тонна дизель отыны бөлінсе, биыл көктемгі жұмыстарға ғана 27 мың тонна бөлініп отыр. Яғни, бұл екі есе көп», — дейді облыстық ауыл шаруашылығы басқармасы басшысының орынбасары Ербол Қуанышев.
Мақаншылық отбасы түйеқұс өсіруге ден қойып, бұл істі негізгі кәсібіне айналдыруға ниетті. Ержан Төлегеннің бастамасы мен табысты тәжірибесі өзгелерге үлгі болып, бүгінде ауылда түйеқұсқа қызығушылық танытқан азаматтар қатары көбейіп келеді.