Ақмола облысының Ерейментау ауданында жалпы инвестиция көлемі 15,5 млрд теңгені құрайтын ірі агроөнеркәсіп ет кластерін құру жобасы басталды. Жұмыс сапары барысында Ақмола облысының әкімі Марат Ахметжанов ауданның кәсіпкерлерімен жобаның перспективаларын талқылады, аймақ әкімдігінің баспасөз қызметі.
Жоба асыл тұқымды мал шаруашылығын, шаруашылықтарды және өнеркәсіптік бордақылау алаңын біріктіре отырып, жабық өндірістік цикл құруды көздейді.
«Кластер құрылымына қалмақ асыл тұқымды сиыр репродукторлары «Торғай» ЖШС және «Соколинки и К» ЖШС, сондай-ақ ірі қара мал бордақылау кешені («Номад» ЖШС) кіреді. 2027-жылға қарай өндірістік қуатын жылына 30 мың басқа дейін жеткізу жоспарланған. Сондай-ақ жайылымдарды арттыру көзделген», – деді консорциум кеңесшісі Гүлмира Исаева.
Кәсіпорынның жоспарында аналық мал басын 17,3 мың басқа дейін көбейту, асыл тұқымды мал басын арттыру және фермерлік шаруашылықтардың кооперациясын дамыту бар. Жоба 240 тікелей және 400 жанама жұмыс орнын ашпақ. Болжам бойынша кластерді іске асырудың экономикалық тиімділігі бюджетке 1,1 млрд теңге түсім әкеледі.
Өңір басшысы жобаның аграрлық сектор үшін маңыздылығын айтты.
«Қазіргі таңда якорлық жобаларды жүзеге асыру үшін барлық жағдай жасалды. Оның тиімділігін халыққа көрсету маңызды. Ерейментау ауданы мал шаруашылығын дамытуға зор әлеуетке ие. Облыстағы жайылымдық жерлердің 23%-ы Ерейментау ауданына тиесілі. Мал өсіруге қолайлы жағдайдың бірі – «Ауыл Аманаты» бағдарламасы. Жеңілдетілген несие қаражаты есебінен 406 бас ірі қара, 1 800 бас ұсақ мал және 53 бас жылқы сатып алынды. Қуаты 100-ден 1200 басқа дейін жететін бірқатар ет шаруашылықтары жұмыс істейді. Халықаралық нарыққа шығу мүмкіндігі бар», – деді облыс әкімі.
Сурет: облыс әкімдігі
