Бірқатар шет елге ауыл шаруашылығы өнімін экспорттық тасымалдауға субсидиялар беру қағидасы енгізіледі. Бұл туралы Ауыл шаруашылығы қызметкерлерінің бірінші форумында Ауыл шаруашылығы министрі Айдарбек Сапаров айтты.
«Техниканы жаңарту қарқынын жылына 8-10 пайызға дейін арттыру бойынша жұмыс жүргізіліп жатыр. Биылғы жылы фермерлер 22 мың техниканы сатып алды. Бұл өткен жылмен салыстырғанда 12 пайызға көп. Кредиторлардың тікелей субсидиялауынан басқа, өзге субсидияларға қатысты да осындай шаралар қабылданды: қаражат бірден лизинг операторларына, тыңайтқыш өндіруші зауыттарға, суаратын суды жеткізушілерге беріледі. Фермерлер тауар мен қызметтерді арзан бағамен алады. Мұндай шаралар субсидиялаудың ашықтығын арттырады және сыбайлас жемқорлықты азайтады», — деді министр.
Оның атап өтуінше, ауыл шаруашылығы тауарын өндірушілер, бәсекелестік жоғары болып тұрған қазіргідей уақытта тиімді әрекет жасау керек.
«Бірінші кезекте біз фермерлерден өнімнің өзіндік құнын төмендетуді, сондай-ақ егіс алқаптарын әртараптандыру жөніндегі жұмысты күшейтуді күтеміз. Бүгінгі нарықтық жағдайды ескере отырып, биылғы рекордтық өнімімізді өткізуіміз — басты міндет. Ол үшін бәсекеге қабілетті баға қою маңызды. Қазіргі жағдайда Әзірбайжан, Ауғанстан, Иран, Ирак, Солтүстік Африка және ЕО елдері бағыттары бойынша экспортқа ауыл шаруашылығы өнімдерін тасымалдауға субсидиялар беру қағидалары мемлекеттік органдармен келісіліп жатыр», — деді Айдарбек Сапаров.
Сурет: Ақорда
