Қазақстандық Дархан Станбеков бірнеше жылдық дәрігерлік мансабын тастап, бүгінде мал шаруашылығын, атап айтқанда асыл тұқымды қой өсіруді жолға қойған, деп хабарлады Ауыл шаруашылығы министрлігінің баспасөз қызметі.
Министрліктің мәліметінше, Дархан Станбековтың ауыл шаруашылығына бет бұру жолы адамға деген қамқорлықтан басталған. Ол Санжар Асфендияров атындағы Қазақ ұлттық медицина университетін тәмамдап, терапия мамандығы бойынша интернатураны, қоғамдық денсаулық сақтау саласында магистратураны меңгерген.
Жедел жәрдем қызметінде, кейіннен Қазақ Ұлттық фтизиопульмонология институтында фтизиатр болып жұмыс істеді. Алайда жүрек қалауы тыныш далаға, мал шаруашылығына, туған жерге пайдалы еңбекке жетеледі.
Бүгінде оның «Жанасыл» шаруа қожалығы мал шаруашылығымен, егіншілікпен айналысады, ал 2023 жылдан бастап асыл тұқымды қой өсіруді жолға қойған. Жаз мезгілін ол түгелдей дерлік далада өткізеді, жем-шөпті өзі дайындайды, төлдеу маусымында демалыссыз жұмыс істейді.
Ведомство өкілдерінің хабарлауынша, Дархан республикалық және халықаралық асыл тұқымды қой көрмелеріне тұрақты қатысып, жүлделі орындарға ие болып жүр. Сондай-ақ ол туған ауылында қайырымдылық пен қоғамдық бастамаларға белсене қатысып, мұқтаж жандарға көмектеседі, жастарға қолдау көресетеді.
«Дархан Станбековтың өмір жолы — жоғары білімді, ісіне адалдықты және туған жерге деген сүйіспеншілікті ұштастыруға болатынын дәлелдейтін шабытты мысал. Мұндай азаматтар — ауыл экономикасының тірегі, елдің мақтанышы», — делінген министрлік таратқан ақпаратта.
Cурет: АШМ
