Біріккен Ұлттар Ұйымы Дүниежүзілік жылқы күнін белгілеген болатын. Бұған Моңғолия президенті бастамашы болған еді. 169 ел қолдап қабылданған Қарарға сәйкес биылдан бастап 11 шілде жылқы күні. Қаулы авторлары жылқы шаруашылығы экономикалық даму мен адамның күнделікті тұрмысы үшін үлкен маңызы бар екенін атап көрсеткен.
Сарапшылардың есебінше, қазір әлемде 57 миллионнан астам жылқы бар. Соның шамамен 5 миллионға жуығы Қазақстанда. Арнайы күнді белгілеу арқылы халықаралық қоғамдастық бұл салаға назар аударып, дамуына оң ықпал етеді деген үміт бар. Бір кездері негізінен мініс құралы болған ат қазір бәйге, көкпар сияқты спорт түрлері мен қатар туризм саласында кеңінен қолданылады. Сондай-ақ жұмыс орындарын құрып, азық-түлік қауіпсіздігін қамтамасыз етуге үлес қосуда.
Қазақ үшін төрт түліктің төресі – жылқының орны бөлек. Кейінгі жылдары еліміздегі жылқыларды асылдандыру ісі жақсы қолға алынып келеді. Етті бағыттағы, мініске арналған жылқылар мен жүйрік аттарға деген сұраныс та артқанын аңғаруға болады.
Сурет: Agrotrend.kz
