Абай облысының әкімі Берік Уәли Үржар ауданына жұмыс сапары барысында Шолпан ауылындағы «Береке» шаруа қожалығының жұмысымен танысты, деп хабарлады облыс әкімдігінің баспасөз қызметі. Жеке кәсіпкер Бекзат Баймұхаметұлы басқаратын шаруа қожалығы тауарлы балық және құс шаруашылығын дамытуды қолға алған. Жалпы құны 55 миллион теңге болатын жобаны кәсіпкер өз қаржысымен іске асыруға бел байлаған.
2024–2026 жылдар аралығында толық іске асатын жоба аясында жылына 50-70 тонна көлемінде тауарлы балық және 3,5 тоннаға жуық қаз еті өндірілмек. Қожалықта негізінен ақ амур мен тұқы балығы өсіріледі.
Қазіргі таңда 2 гектар аумаққа тоған салынып, 20 мың дана шабақ жіберілген. Жоба аясында қонақүй де салынған. Бүгінде үй құстарына арналған қораның құрылысы жүргізіліп жатыр. Жобаға 16 гектар жер бөлінген. Ал өндірістік нысанда 5 адам жұмыспен қамтылатын болады. Жалпы Үржар ауданында осы іспеттес 3 жобаны іске қосу жоспарланып отыр.
Кәсіпкер жобаны толық іске қосу үшін екі бағытта мемлекеттік қолдауға мұқтаж екенін жеткізді. Облыс әкіміне өндірістік аймаққа электр жарығын тартуға, «Ауыл аманаты» бағдарламасы шеңберінде 2,5 пайыздық жеңілдетілген несие алуға көмек көрсетуді сұрады.
Аймақ басшысы жобаның маңызды екенін атап өтіп, кәсіпкерге мемлекеттік бағдарламалар аясында көмек көрсетілетінін айтқан.
Сурет: облыс әкімдігі
