Қазақстан Республикасы Премьер-министрінің орынбасары – ұлттық экономика министрі Серік Жұманғарин жұма күні Ақмола облысына барып, «Ен дала» шаруашылығының егіс алқаптарындағы егін жинау жұмыстарымен және Целиноград ауданы Мәншүк ауылындағы 2 мың сауын сиырға арналған сүт-тауарлы ферманың қызметімен танысты, деп хабарлады Ауыл шаруашылығы министрлігінің баспасөз қызметі.
Жобаның жалпы құны – 6,2 млрд теңге. Оның ішінде 4 млрд теңге 2,5%-дық жылдық мөлшерлемемен «Үлкен жоба» аясында жеңілдетілген несие ретінде берілген. Бүгінде фермада 2000 бас сауын малы бар. Өндірістік қуаты – жылына 12 мың тонна, тәуліктігіне – 33 тонна сүт. Кәсіпорында 70-тен астам жұмыс орны ашылған.
«Кездесуде фермерлерді мал шаруашылығын қолдау шаралары қызықтырды. Ауыл шаруашылығы вице-министрі Аманғали Бердалиннің хабарлауынша, 1 тамыздан бастап мал шаруашылығында 50 млрд теңге көлемінде 5%-дық жылдық мөлшерлемемен жеңілдетілген несиелеудің жаңа бағдарламасы іске қосылды. Жақын уақытта жоғары өнімді асыл тұқымды мал сатып алуға арналған «Игілік» бағдарламасы басталады», — делінген министрлік таратқан ақпаратта.
Бұл мал басының өсуін және генетика сапаның жақсаруын қамтамасыз етіп, саланың өнімділігіне оң әсерін тигізеді, деген жоспар бар.
«Ауыл шаруашылығы экономиканың өсу драйверіне айналды. Оның ЖІӨ-дегі үлесі шамамен 3,9% болғанымен, тасымалдау, қоймаға сақтау, қайта өңдеу және азық-түлік өндірісінің артуы есебінен жиынтық мультипликативті әсері әлдеқайда жоғары. Қазір біз жастарды ауылға тарту және ветеринар мамандығын жан-жақты қолдау бағытында жұмыс істеп жатырмыз», — деді кездесуді қорытындылаған Серік Жұманғарин.
Сурет: Agrotrend.kz
