Ақмола облысының Целиноград ауданына қарасты Қабанбай батыр ауылындағы «Bio Nord» ЖШС өсімдік шаруашылығымен айналысады. 1000 гектар суармалы жеріне картоп, сәбіз және мал азығын егеді. Мұнда 15 адам тұрақты жұмыс істейді. Жиын-терім кезінде қосымша жұмысшылар тартылады екен.
2013 жылы 200 гектар алқаптан бастаған еңбегі берекелі болып, бұл күндері 1000 гектарлық межеден асқан. Астанаға іргелес жатқан Қабанбай ауылдық округінің құнарлы жерінде картоп, сәбіз, жүгері өсіріп, мал бағып отыр. Жоңышқа мен арпа сияқты малдың жем-шөбі де өз алқаптарында өседі.
Картобы мен сәбізін берісі Астана, әрісі оңтүстік өңірлердің алыпсатарлары талап әкететін көрінеді. Жүгері мен жоңышқасын малға береді. Айтуға оңай, атқаруға қиын кәсіптің машақаты да шаш етектен екені белгілі. «Бір ғана жанар майдың бағасы қалтадан қағап, балақтан тартқанда қаражатты қай жағына жеткізерімізді білмей, абдырап қаламыз», — дейді шаруашылық басшысы Байбосын Сабилов.
Осындай қиындықтарды еңсеруге Аграрлық несие корпорациясының «Кең дала 2» бағдарламасы арқылы берілетін 5 пайыздық жеңілдетілген несие үлкен көмек болғанын айтады, шаруалар.
Естеріңізге сала кетейік, биыл көктемде егін егу және күзгі жиын терім жұмыстарын жүргізу үшін Аграрлық несие корпорациясының жаңа «Кең дала 2» бағдарламасы іске қосылған болатын. Бұл қаржы ресурстары жеке капитал нарығынан тартылады, бұл ретте қарыз алушылар үшін жылдық сыйақы мөлшерлемесі жеңілдетілген 5% мөлшерінде бекітілді. Биыл кепіл мүлкі жетпейтін фермерлер үшін алғаш рет «Даму» Қоры қарыз сомасының 85%-ын кепілдендіретін болды. Өтінім тек Аграрлық несие корпорациясына беріледі, одан әрі шаруа кепілдік алуы үшін Корпорация Қорға өтінімді өзі жібереді.
Өткен жылы Аграрлық несие корпорациясы мен ҚазАгроҚаржының қаржыландыру көлемі 554,7 млрд теңгені құрап, абсолютті тарихи көрсеткішке жеткен. Биыл жыл соңына дейін жалпы қаржыландыру сомасы 700 млрд теңгеден асады деп жоспарланып отыр.
Бір сөзбен айтқанда, еңбек етемін деген шаруаларға мемлекет тарапынан қомақты қаржы бөлініп, үлкен қолдау көрсетіліп келеді. Тек тиісті қаржыға қол жеткізу үшін шаруалар құжаттарын түгендеп, өтінім берулері тиіс.
