Ақтөбе облысының Мәртөк ауданында сүт бағытындағы екі ірі шаруа қожалығы өз өндірісін кеңейтіп жатыр, деп хабарлайды облыс әкімдігінің баспасөз қызметі.
Ауданға жұмыс сапары аясында облыс әкімі Асхат Шахаров Мемлекет басшысының ауыл шаруашылығы өнімдерін өндіру көлемін ұлғайту жөніндегі тапсырмасының іске асырылу барысымен танысты.
Әкім «Айс» ЖШС фермасына барды. Қазір фермада мың бас сауын сиыр бар. Мұнда жылына 12 664 тонна сүт өндіріледі. Өндірісті кеңейтудің бірінші кезеңінде тауарлы сүт фермасын салу және сауын сиырлардың санын 800 басқа дейін жеткізу жоспарлануда. Құрылыс аяқталуға жақын. Жобаның құны 5,3 млрд. теңге, оның ішінде 3,2 млрд теңгесі — несие қаражаты. Бұл қаржыға құрылыс жұмыстарынан бөлек, сиыр сауу қондырғысы мен 800 бас ірі қара мал сатып алу жоспарлануда. Ферма іске қосылса, оның өндірістік қуаты екі есеге артып, жылына 22,6 мың тонна сүт сауылады. Екінші кезеңде сауын сиырлардың санын тағы 800 басқа көбейту жоспарлануда. Ол кезде ферманың қуаты тағы артып, жылына 32,6 мың тонна сүт алатын болады. Сондай-ақ, ферма іске қосылғанда қосымша жұмыс орындары ашылады. Нысан 2024 жылдың соңында пайдалануға беріледі деп жоспарлануда.
«Ақтөбе облысында сүт өндірісі белсенді дамып келеді. Мемлекет басшысының сүт және басқа да ауылшаруашылығы өнімдерін өндіру көлемін ұлғайту жөніндегі тапсырмасын іске асыру аясында бірден екі ауыл шаруашылығы құрылымы, атап айтқанда «Айс» ЖШС және «Рад-Агро» ЖШС жаңа сүт фермаларын салып жатыр. Бұл жобаларды іске асыру халықты сапалы және қолжетімді сүт өнімдерімен қамтамасыз етуге мүмкіндік береді. Сондай-ақ, фермалардың іске қосылуы аймақтың ауыл шаруашылығы экономикасының жақсаруына әсер етеді. Сүт бағытын дамыта отырып, жаңа жұмыс орындарын құрамыз, жергілікті өндірушілердің табысы артады», — деп атап өтті облыс әкімі.
Сурет облыс әкімдігінің сайтынан алынды
