Биыл 24-қарашадан бастап «Ауыл аманаты» бағдарламасын жүзеге асыру аясында Amanatnesie.kz электрондық платформасы іске қосылады, деп хабарлады Қарағанды облысының Ауыл шаруашылығы және жер қатынастары басқармасы. Бұл платформа арқылы ауыл тұрғындары жеңілдетілген микрокредиттерге онлайн өтінім бере алады.
Платформаның негізгі мақсаты – ауыл халқының табысын арттыру, ауыл кәсіпкерлігін дамыту және бастамашыл жобаларды қолдау.
Amanatnesie.kz – бұл қолжетімді, ыңғайлы әрі ашық жүйе. Платформа арқылы әрбір үміткер:
— кредит беру шарттарымен таныса алады;
— өтінімді онлайн жолдайды;
— қажетті құжаттарды тіркейді;
— өтінімінің статусын қадағалай алады.
Платформа әкімшілерінің ақпараты бойынша өтінішті онлайн режимінде 10 минут ішінде рәсімдеуге болады, ал өтінім 15 күн ішінде қаралады.
«Ауыл аманаты» бағдарламасының мақсаты – ауыл тұрғындарының табысын арттыру. Бағдарлама аясында ауылдарда бизнесті бастау мен дамытуға мал шаруашылығы саласында 7 жылға дейінгі және басқа жобалар үшін 5 жылға дейінгі мерзімге 2,5%-бен несие беріледі. Жеке тұлғалар үшін қарыздың ең жоғары сомасы 2,5 мың АЕК, ал ауыл шаруашылығы кооперативтері үшін 8 мың АЕК.
ҚР Үкіметінің мәліметінше, 2025-жылы «Ауыл аманаты» бағдарламасын жүзеге асыруға 50 млрд теңге бөлінген, 2026-2028 жылдарға шамамен 450 млрд теңге бөлу жоспарланған. Осы қаражат есебінен 25 мыңнан астам жоба қаржыландырылады және кемінде 30 мың жұмыс орыны ашылады, деген жоспар бар.
Сурет: Agrotrend.kz
