Қазақстанда субсидияланатын өнімдердің тізбесі кеңейтіліп, оған қайта өңдеуге тапсырылатын тері мен жүн қосылады. Бұл туралы ҚР Премьер-министрі Олжас Бектенов депутаттық сауалға жауап берегенде хабарлады.
Ол қой шаруашылығы өнімдерін қайта өңдеуді дамытуды ынталандыру үшін инвестициялық салымдарды субсидиялау Қағидалары шеңберінде жүн дайындау пункттерінің жабдықтар сатып алуларына, тері мен жүнді қайта өңдеу кәсіпорындарын құруға және кеңейтуге жұмсалған шығындардың 25 пайызы өтелетінін айтты.
Агроөнеркәсіп кешені саласындағы жобаларды несиелеу қағидаларына сәйкес жүн мен теріні терең өңдейтін кәсіпорындарға 2,5%-бен 5 млрд теңгеге дейін жеңілдетілген несие беріледі.
«Ауыл шаруашылығы өнімдерін қайта өңдеуді дамытудың 2024–2028 жылдарға арналған Кешенді жоспары шеңберінде қайта өңдеу кәсіпорындарын шикізатпен қамтамасыз ететін қой шаруашылықтарын құру жөніндегі жобаларды іске асыру, сондай-ақ дайындау пункттерінің желісін қалыптастыру көзделген. Ауыл шаруашылығы шикізатын ұтымды пайдалану үшін өңдеуге тапсырылатын тері мен жүнді қоса алғанда, субсидияланатын өнімдердің тізбесін кеңейту жоспарлануда», — деді О.Бектенов.
Сонымен қатар, ол биязы жүнді қой шаруашылығы саласында өнімділіктің түрлі бағыттарындағы қойлардың генетикалық ресурстарын жетілдіру, сақтау және ұтымды пайдаланудың заманауи селекциялық-технологиялық және молекулалық-генетикалық әдістерін әзірлеу жобасы іске асырылып жатқанын хабарлады. Оны іске асыруға шамамен 1 млрд теңге көлемінде қаржы қарастырылған. Бағдарламаның орындаушысы Жәңгір хан атындағы Батыс Қазақстан аграрлық-техникалық университеті болып белгіленді.
«Ғылыми-зерттеу жұмыстары жыл бойы өндірістік циклі бар, жануарларды ұстаудың, азықтандырудың және өсімін молайтудың тиімді технологияларын қолдануды көздейтін қарқынды үлгідегі көпбейінді қой шаруашылығы кешенінің тұжырымдамасын әзірлеуді қамтиды», — деді Үкімет басшысы.
Жалпы, мал шаруашылығы саласында жеңілдікпен 5%-дық несие беру бағдарламаларын кеңейтуді, «Игілік» бағдарламасы бойынша асыл тұқымды малды сатып алуға ұзақ мерзімді қаржыландыру тетіктерін енгізуді, қамту деңгейі 80%-ға дейінгі «Даму» қоры арқылы арқылы несиелерге кепілдік беру құралын енгізуді көздейтін Кешенді даму жоспары әзірленуде.
Сурет: Agrotrend.kz
