Абай облысының әкімі Берік Уәли Көкпекті ауданына жұмыс сапары барысында Көкжайық ауылындағы «Елім-ай Көкпекті» ЖШС-нің тыныс-тіршілігімен танысты, деп хабарлады аймақ әкімдігінің баспасөз қызметі.
2011-жылы құрылған серіктестік асыл тұқымды ірі қара өсірумен және егін шаруашылығымен айналысады. Мұнда қазіргі таңда 150-ден астам адам еңбек етеді. Бүгінде мал тұқымын асылдандыру бағытында ауқымды жұмыс жүргізілуде. Шаруашылықта 2 650 бас сиыр бар. Оның 1 600-і қазақтың ақбас тұқымы, 1 050-і Австралиядан әкелінген ангус тұқымды сиырлар. Ерекше атап өтерлігі, шаруа қожалығы екі тұқымды будандастырып, жаңа тұқым алған.
Шаруашылық ет және сүт бағытындағы өнімдерді ішкі нарыққа ұсынумен қатар, экспортқа шығаруға да әлеуетті. «Елім-ай Көкпекті» ЖШС облысымызда тұңғыш болып Өзбекстан мемлекетіне 700 бас ірі қара экспорттады. Аудандағы шағын шаруа қожалықтары соңғы жылдары малдарын қалаға апармай, серіктестікке әкеліп өткізуде. 5 мың басқа арналған бордақылау алаңы да бар. Мұнда 1 500 бас еркек тайыншалар бордақылануда.
Өсімдік шаруашылығы да жолға қойылған. «Елім-ай Көкпекті» агроөнеркәсіп кешенінде 1 700 гектар суармалы жер бар. Оның 630 гектарына жоңышқа егілген. Соңғы 5 жылда АҚШ және Түркиядан 25 заманауи суару техникасы сатып алынды. Шаруашылық Көкпекті ауданында жаңбырлатып суару жүйесін алғаш болып іске қосты. Соның нәтижесінде жоңышқаны үш мәрте ору мүмкіндігі бар.
Облыс әкімі агроөнеркәсіп кешенінің мал бордақылау, жем-шөп қоры сақталатын алаңдарын, егістік алқаптарын аралап, шаруашылық жұмысына жоғары баға берді.
««Елім-ай Көкпекті» – өңіріміздегі ірі агроөнеркәсіптік кешендердің бірі. Мал мен егін шаруашылығын қатар дамытып, жоғары нәтижелерге қол жеткізіп отыр. Заманауи техникалармен толық жабдықталған, шетелге де мал экспорттайды. Осындай шаруашылықтардың облыс үшін маңызы зор. Олар жаңа жұмыс орындарын ашып, өңірдің азық-түлікпен қамтылуына үлес қосып жатыр. Осы бағыттағы жұмысты жалғастыру керек. Әкімдік тарапынан тиісті қолдау көрсетеміз», – деді аймақ басшысы.
Сурет: облыс әкімдігі
