Абай облысының Мақаншы ауданында құрама жем өндіретін заманауи зауыттың құрылысы жүріп жатыр. Бұл құны 7 млрд теңгені құрайтын аудандағы ірі инвестициялық жоба. Бұл туралы Ауыл шаруашылығы министрлігінің баспасөз қызметі хабарлады.
«DI-NUR» ЖШС кәсіпорынды биыл іске қосуды жоспарлап отыр. Жаңа зауыт облыста өңдеу саласындағы негізгі өндіріс орындарының біріне айналады. Кәсіпорын жылына 1000 тоннаға дейін құрама жем шығара алады, 1000 тонна бидайды өңдеуге, 1000 тонна күнбағыс тұқымын тазартуға, сондай-ақ 300 тонна майлы дақылдарды қайта өңдеуге және шамамен 300 тонна май өндіруге мүмкіндігі жетеді.
Тазартылған күнбағыс өнімін және басқа өңделген тауарларды өндіру өңірдің өнеркәсіптік әлеуетін нығайтады, ауданның өз өнімімен қамтамасыз етілуін арттырады және аграрлық сектордың әрі жалпы аймақ экономикасының дамуына тың серпін береді.
Сурет: АШМ
