Абай облысы әкімінің орынбасары Думан Оспановтың төрағалығымен су саласын дамыту мәселелеріне арналған кеңес өтті, деп хабарлады Ауыл шаруашылығы басқармасының баспасөз қызметі.
Іс-шараға «Қазсушар» РМК «Абай» филиалының директоры, облыстық ауыл шаруашылығы басқармасының басшысы және аудан әкімдері қатысты.
«Кеңесте өңірдегі су ресурстары қорының молдығы және гидропотенциалының жоғары екені айтылды. Су ресурстарын тиімді пайдалану мәселесі көтеріліп, осы бағыттағы атқарылып жатқан жұмыстар жан-жақты талқыланды. Сондай-ақ, иесіз қалған шаруашылықішілік арналарды теңгерімге алу және оларды жөндеу мәселелері де қаралды», — делінген басқарма таратқан ақпаратта.
Айта кетейік, «Қазсушар» РМК жергілікті филиалы суармалы су беру бойынша шаруа қожалықтарымен 355 келісімшарт жасасқан. Аймақта филиалдың су шаруашылығы нысандары Үржар, Жарма, Көкпекті, Ақсуат аудандарында орналасқан. Келесі жылы Ақсуат ауданындағы Қарғыба өзенінде жаңа су қоймасының құрылысы басталады. Жаңа су қоймасы мен магистральді каналдар аудандағы ирригациялық жүйелердің толыққанды әрі тиімді жұмыс істеуін қамтамасыз етеді.
Жиын соңында облыс әкімінің орынбасары Думан Оспанов аудан әкімдері мен салаға жауапты мамандарға бірқатар нақты тапсырмалар берді.
Сурет: Ауыл шаруашылығы басқармасы
