2025-жылдың көктемгі егy мен күзгі жиын-терім жұмыстарын қаржыландыруға 700 млрд теңге бөлінеді. Несие беру қараша айының соңында басталады, деп хабарлады Үкімет отырысында ауыл шаруашылығы вице-министрі Азат Сұлтанов.
«Ағымдағы жылдың желтоқсан айында қаржыландыруды бастау туралы Президенттің тапсырмасын орындау үшін Үкімет қаулысының жобасы әзірленді, ол осы отырыстың қарауына шығарылды. Бұл шешімді күтпестен Аграрлық несие корпорациясы 29 қарашадан бастап 100 млрд теңге көлемінде қаржыландыруды бастайды. Қазіргі уақытта 500-ден астам ауыл шаруашылығы өндірушілерінен өтінімдер келіп түсті», — деді Азат Сұлтанов.
Қаражат фермерлерге екінші деңгейлі банктер, несие серіктестіктері, әлеуметтік-кәсіпкерлік корпорациялар және Аграрлық несие корпорациясы арқылы беріледі. Азат Сұлтанов атап өткендей, өңірлердің барлық ӘКК-ы бағдарламаға қатысулары қажет, өйткені 2024 жылы қаржыландыруға тек 7 ӘКК қатысты.
Саланы «ұзақ» және қолжетімді кредиттік ресурстармен қамтамасыз ету мақсатында жеңілдетілген несиелеуге көшу арқылы фермерлердің несиелерін субсидиялау жүйесі қайта қаралатын болады.
Сурет: agrotrend.kz
