Қазақстандық «Ақ Бидай-терминал» АҚ мен Әзербайжанның ірі холдингі NB Holding бірлескен бақылаудағы «Баку астық терминалы» ЖШС кәсіпорнын одан әрі дамыту мәселелерін талқылады, деп хабарлады ҚазАқпарат агенттігі.
«Ақ Бидай-Терминал» АҚ басқарма төрағасы Нұрлан Ерқожаұлы Баку қаласына жұмыс сапары аясында NB Holding басшылығымен кездесу өткізді. Соның барысында теңіз арқылы Әзербайжанға астықты жеткізуді қамтамасыз ету жайы, ұн өнімдерін өткізудің экспорттық бағытында кәсіпорынның әлеуетін дамыту мәселелері талқыланды.
Кездесуден кейін тараптар бірлесе бақыланатын кәсіпорын – «Баку астық терминалы» ЖШС-ға барды. Онда NB Holding басшылығымен қол жеткізілген келісімдерді жүзеге асыру жоспарлары тілге тиек етілді. Бірлескен іс-шаралар жоспарына кәсіпорынды астықпен үздіксіз қамтамасыз ету, жоғары сапалы ұн өнімдерін шығару және ұнды көршілес нарықтарға сату кіреді.
«Қараша айының соңына дейін қазақстандық тарап Баку астық терминалының диірмен кешеніне өңдеуге жоғары санатты бидайдың 6 мың тонна бастапқы партиясын жіберуді көздеп отыр. Алдағы уақытта Таяу Шығыс елдеріне ай сайын 3 мың тоннаға жуық ұн жөнелту жоспарланған», — деді Нұрлан Ерқожаұлы.
Айта кетейік, «Баку астық терминалы» кәсіпорны өзінің диірмен кешенінде ұн өндіретін әмбебап астық терминалы.
Сурет Баку астық терминалы
