Абай облысының шаруаларына 2 миллиард теңге несие берілді, деп хабарлайды 24.kz. Қаражат фермаларды дамыту жобаларын жүзеге асыруға бағытталды. Мемлекет тарапынан қолдауға ие болған екі шаруа қожалығы шетелден 600-ден астам сауын сиыр сатып әкелді. Сүт фермалары техникалық базасын жаңартып, жабдықтар алып жатыр.
«Қалиханұлы» шаруа қожалығының сүт өнімдері көпшілікке «Айша» деген сауда маркасымен танымал. Семейдегі сүт өңдейтін зауыттан 17 түрлі өнім шығады. Қазір кәсіпкер мемлекеттік қолдаудың арқасында шетелден 252 бас асыл тұқымды ірі қара сатып алды. Ал, Көкпекті ауданындағы «Өрнек» серіктестігі Германиядан биыл 349 бас сауын сиыр әкелді. Шаруа қожалығында күніне 700 сиыр сауылып, 10-11 тонна сүт алынады. Шаруашылықта 150 адам жұмыс істейді екен.
«Шаруа қожалықтарына қойылатын талаптар бар. Мысалы, техникалық базасы, егістік және жайылымдық жері болуы керек. Осы салада 5 жыл жұмыс істеуі шарт. Қаражат осы талаптарға жауап беретін кәсіпкерлерге берілді»,- дейді облыстық Ауыл шаруашылығы басқармасы басшысының орынбасары Бауыржан Артықбаев.
Биыл агроөнеркәсіп кешені саласында 6 млрд теңге несиеге 7 инвестициялық жобаны іске асыру жоспарланған.
Сурет simmental.co.nz
