Қазақстанда пастерленген түйе сүтінің сапасы мен қауіпсіздігіне қойылатын талаптарды айқындайтын ұлттық стандарт әзірленді. Жаңа құжат түйе сүтінен өндірілетін өнімдердің түрлерін көбейтуге және отандық өндірушілердің экспорттық әлеуетін арттыруға бағытталған. Стандарт 2026 жылғы 1 қарашадан бастап күшіне енеді. Бұл туралы Сауда және интеграция министрлігінің баспасөз қызметі хабарлады.
СТ РК 4050-2026 «Пастерленген түйе сүті. Техникалық шарттар» ұлттық стандарты 2026 жылғы 11 қыркүйекте ҚР Сауда және интеграция министрлігі Техникалық реттеу және метрология комитеті төрағасының бұйрығымен бекітілген.
Құжатты «ҚазСтандарт» кәсіпорны 2026 жылға арналған Ұлттық стандарттау жоспары аясында әзірледі. Стандартты әзірлеуге өтінім беруші ретінде «Антиген» ғылыми-өндірістік компаниясы қатысқан.
Қазақстанда түйе сүті дәстүрлі түрде шұбат пен қымыран өндіру үшін пайдаланылады. Сонымен қатар, соңғы жылдары оны өңдеу арқылы өнімнің жаңа түрлерін шығару мүмкіндіктері де кеңейіп келеді. Атап айтқанда, түйе сүтінен балмұздақ, конфитюр және кофе негізіндегі сусындар өндіріледі. Соның бірі – түйе сүтінен дайындалатын капучиноның баламасы саналатын «камелчино» сусыны.
Жаңа ұлттық стандарт пастерленген түйе сүтінің сапасы мен қауіпсіздігіне, таңбалануына, қапталуына, тасымалдануына және сақталуына қойылатын талаптарды белгілейді. Сондай-ақ құжатта өнімнің жіктелуі, бірыңғай терминологиясы және оның сипаттамаларын бағалауға арналған көрсеткіштер қамтылған.
Бірыңғай талаптардың енгізілуі түйе сүтін өңдейтін кәсіпорындарға өнім ассортиментін кеңейтіп, ішкі және сыртқы нарықтарға шығуға мүмкіндік береді. Экспорттың перспективалы бағыттары ретінде Еуразиялық экономикалық одақ елдері, Қытай және Таяу Шығыс мемлекеттері қарастырылып отыр.
Жаңа стандарт түйе сүтін тек дәстүрлі сусын өндіруге арналған шикізат ретінде ғана емес, қосылған құны жоғары түрлі сүт өнімдерін шығаруға мүмкіндік беретін ауыл шаруашылығы өнімі ретінде дамытуға жағдай жасайды.
Сурет: Сауда министрлігі
