Абай облысында 2022-2025 жылдар аралығында 481,5 мың гектар ауыл шаруашылығы жері мемлекет меншігіне қайтарылған. Бұл туралы аймақ басшысы Берік Уәлидің төрағалығымен өткен әкімдік отырысында айтылды.
Облыс әкімдігі баспасөз қызметінің хабарлауынша, осы жерлерді айналымға енгізу жұмыстары жүргізілуде. Былтырғы жылдың IV тоқсанында жоспарланған 70,8 мың гектардың орнына 74,3 мың гектар жер айналымға енгізілген. Биыл I тоқсанда 132,5 мың гектар жоспарланған болса, 135,1 мың гектар жер қайта игерілген.
Бұдан бөлек Үкіметтің тиісті қаулысына сәйкес бұрынғы Семей ядролық сынақ полигонының 983,7 гектар жері пайдалануға болатын жерлер құрамына ауыстырылды. Оның ішінде 473,5 мың гектар жер Жаңасемей ауданына бекітіліп, кезең-кезеңімен шаруашылық айналымға енгізіледі.
Биыл облыста пайдаланылмай жатқан 90 мың гектар ауыл шаруашылығы жерлерін мемлекетке қайтару жұмысы басталып, бүгінде 71,1 мың гектар жер қайтарылды. Бұл жылдық жоспардың 79%-ын құрайды. Қайтарылған жерлердің басым бөлігі жалдау мерзімінің аяқталуы, сот шешімдері және ерікті түрде қайтару есебінен жүзеге асқан.
Облыс әкімі аталған бағыттағы жұмыстың маңызына тоқталып, жүйелі түрде жалғастыру қажеттігін атап өтті.
«Мемлекет басшысының жер ресурстарын тиімді пайдалану және қайтарылған ауыл шаруашылығы жерлерін айналымға енгізу жөніндегі тапсырмасы өңір дамуының стратегиялық бағыты екенін түсінуіміз қажет. Берілген тапсырмаға сәйкес 2026 жылдың ортасына дейін қайтарылған барлық ауыл шаруашылығы алқаптары тұрақты айналымға енгізілуі керек», – деді Берік Уәли.
Аймақ басшысы аудан әкімдеріне жерлерді айналымға енгізу жұмыстарын қатаң бақылауға алуды, бұл бағытта инвесторларды тарту жұмысын жандандыруды тапсырды.
Сурет: облыс әкімдігінің баспасөз қызметі
