«ҚазАгроҚаржы» АҚ бүгіннен бастап «Өз жем-шөбіміз» және «Жеңілдетілген лизинг» бағдарламалары бойынша ауыл шаруашылығы техникасын лизингке алуға өтінімдер қабылдайды. Бұл туралы Ауыл шаруашылығы министрлігінің баспасөз қзыметі хабарлады.
Мемлекет басшысының 2026 жылы отандық мал шаруашылығын дамыту бойынша жүктеген міндеттері аясында «Өз жем-шөбіміз» бағдарламасын іске асырудың маңыздылығы арта түсті. Жем-шөп базасын нығайтудан бастап дайын өнім шығаруға дейінгі толыққанды өндірістік тізбекті құру мәселесі сапалы техникалық жарақтандыруды талап етеді.
Бұл бағдарлама аясында аграрлық сала өкілдері жем-шөп дайындайтын техниканы және мобильді суару жүйелерін (қазақстандық және шетелдік өндіріс) жеңілдікпен лизингке алуға мүмкіндік береді.
Қаржыландыру шарттары бойынша жылдық сыйақы мөлшерлемесі 6%, мерзімі 10 жылға дейін, алғашқы жарна — 15%-дан басталады. Бағдарлама мал өсірумен және бордақылаумен айналысатын, сондай-ақ қажетті жер ресурстары бар шаруашылықтарға арналған.
Бағдарламаға қатысушылар екі жыл ішінде еңбекақы қоры мен салық түсімдерін 10%-ға арттыру бойынша міндеттемелер қабылдайды.
Сонымен қатар елімізде шығарылған және құрастырылған ауыл шаруашылығы техникасын лизингке алуға бағытталған «Жеңілдетілген лизинг» бағдарламасы бойынша өтінімдер қабылданады.
Бағдарлама шарттары бастапқы жарнасыз (0%), сыйақы мөлшерлемесі жылдық 6%-ды құрайды, ал қаржыландыру мерзімі 10 жылға дейін белгіленген. Бұл фермерлердің айналымдағы қаражатына түсетін салмақты азайтуға мүмкіндік береді.
Аграрлық сала өкілдері Telegram-бот арқылы кезекке тұрып, «ҚазАгроҚаржы» ресми сайтында электронды өтінім бере алады немесе өңірлік филиалдарға жүгінуге болады.
Сурет: Agrotrend.kz
